Үтүө санаа холбуйата

Киин куоракка «Үтүө санаа холбуйата» аахсыйа түмүктэннэ. Аахсыйа чэрчитинэн, икки нэдиэлэ иһигэр, куорат олохтоохторо 80-тан тахса араас бэлэхтэри аҕалан туттардылар: оонньуурдары, кинигэлэри, канцтабаардары.  Хомуллубут бэлэхтэри «Берегиня» оҕо дьиэтигэр биэрдилэр.
Аахсыйа «Биир ньыгыл Арассыыйа» Эдэр Гвардиятын регионнааҕы салаатын көҕүлээһининэн ыытылынна. Бэлэхтэри биэриигэ ХИФУ устудьуоннарын Профсойууһа уонна эдэр гвардеецтар кытыннылар.
«Эдэр Гвардия» аппараатын салайааччыта Саргылаана Колесова тулаайах оҕолорго бэлэх оҥорбут дьоҥҥо махталын биллэрдэ: «Уопсастыба тулаайах оҕолорго болҕомтотун уурара улахан суолталаах. Ити оҕолорго кыра кыһамньы тиксэр. Кинилэргэ бэлэхпитин кытта дууһабыт сылааһын биэрэрбититтэн үөрэбит. Бу аахсыйаҕа кыттыбыт дьоҥҥо барыгытыгар махталбын тиэрдэбин!».