Сылаас тохтобул ахсаана 100-кэ тиийиэҕэ

2021-2022 сылларга Дьокуускайга 20 сылаас тохтобул тутуллуоҕа. Былаан быһыытынан, сылаас тохтобул уопсай ахсаана 100-кэ тиийиэхтээх.

Билигин 3 сылаас тохтобул тутуллан бүтэн эрэр – “Дьиэ-уот сыһыаннаһыытын Департамена”, “Сельхозтехникум” уонна “Воинская”. Тохтобуллар бары биир истииллээх, тэҥ моһуоннаах буолуохтара. Эһиилги сылга өссө 20 сылаас тохтобул тутуллуоҕа.

Киин куоракка билиҥҥитэ 32 сылаас тохтобул үлэлиир – барыларын “ЯПАК” МУТ бас билиитигэр биэрэр туһунан быһаарыы 2020 сыллаахха ылыллыбыта. Тохтобулларга үлэлиир предпринимателлэр арыанда быраабылатын толороллоро кытаанахтык ирдэниэҕэ, кэмигэр ыраастааһын, сууйуу-сотуу ыытыллар гына үлэлэрэ сааһыланыаҕа, атыылыыр табаардарыгар кытта кэккэ ирдэбиллэр туруоруллуохтара. Сорох тохтобулларга туалеттар аһыллаллара былааннанар.