Сыл бастыҥ спортсменнарын уонна тренердэрин чиэстээтилэр

Ахсынньы 20 күнүгэр олохтоох дьаһалтаҕа 2021 сыл спорт түмүктэрин таһаардылар. Үөрүүлээх тэрээһиҥҥэ Дьокуускай куораттааҕы Дуума бэрэссэдээтэлин бастакы солбуйааччы Евдокия Евсикова, физическай култуура уонна спорт Управлениетын начаалынньыга Константин Бурцев, нэһилиэнньэ социальнай харалтатыгар уонна үлэҕэ Управление салайааччыта Семен Матвеев кыттыбыттар. Бу туһунан Уокуруктааҕы дьаһалта пресс-сулууспата иһитиннэрдэ.
Уокуруктааҕы дьаһалта уонна Дьокуускай куораттааҕы Дуума ааттарыттан бастыҥ спортсменнары уонна тренердэри Дуума бэрэссэдээтэлин бастакы солбуйааччы Евдокия Евсикова эҕэрдэлээбит.
«Бүгүн саалаҕа физкултуураны уонна спорду олохторун арахсыспат аргыһа оҥостубут дьон бааллар. Ааһан эрэр сылга коронавирус инфекциятын пандемията олохпутугар уларыйыыны киллэрдэ, ол иһигэр спортка уонна физическай көххө. Ол эрэн, Дьокуускай куорат хомуур хамаандатын чилиэннэрэ XXI Манчаары оонньууларыгар ситиһиилээхтик кыттыбыттара, Арассыыйа официальнай чемпионаттарыгар кыттан эмиэ ситиһиилэрдэммиттэрэ, биһигини үөрдүбүттэрэ», – диэбит  Евдокия Евсикова.
СӨ физическай култууратыгар уонна спортка дьоһун кылааттарын, таһаарыылаах уонна үтүө суобастаах үлэлэрин иһин «Дьокуускай куорат физическай култууратын уонна спордун сайдыытыгар кылааттарын иһин» түөскэ анньынар бэлиэнэн «Детско-юношеская школа № 1» МБТ старшай тренер-преподавателэ Петр Нечаев, «Детско-юношеская школа № 2» МБТ тренер-преподавателэ Лилия Сидорова, «Фитнес Лайф» фитнес-кулууп генеральнай дириэктэрэ Виктор Салтыков наҕараадаламмыттар. 
«СӨ үөрэҕириитин туйгуна» бэлиэнэн «Детско-юношеская школа № 5» МБТ волейболга тренер-преподавателэ Светлана Муратованы наҕараадалаабыттар.
Ааһан эрэр сылга ураты көрдөрүүлээх спортсменнарга уонна тренердэргэ «Лучший спортсмен 2021 года», «Лучший спортсмен 2021 года по адаптивным видам спорта», «Лучший тренер 2021 года», «Лучший тренер 2021 года по адаптивным видам спорта» өйдөбүнньүк бэлиэлэри туттарбыттар.