Сыл бүтүөр диэри сылаас тохтобуллар үлэҕэ киириэхтэрэ

Сакаасчык «Главстрой» МХТ информациятынан, 2021 сыл ахсынньы ыйа бүтүөр диэри  14 сылаас тохтобул бары «Якутскэнерго»  ПАУо ситимнэригэр холбонор уонна үлэҕэ киирэр буолбут. Ол туһунан Уокуруктааҕы дьаһалта пресс-сулууспата иһитиннэрдэ.
Бүгүҥҥү күннээҕи туругунан «Воинскай», «Жилищнай департамент», «Сельскохозяйственнай техникум», «Площадь Победы», «Силуэт», Хабаров уулуссатыгар «Алмазэргиэнбанк» сылаас тохтобуллар арыллан «ЯПАК» МУТ үлэлэтэригэр бэриллибиттэр. 
Ахсынньы 23 күнүгэр диэри Мерзлотнай уул., «Институт мерзлотоведения», Кальвица уул., «Школа №10», Стадухин уул., «Областная больница», Советскай Армия 50 сыла уул., «Авиагруппа», Маҥан сэлиэнньэтин Алымов уул., «Магазин» уонна Маҥанныыр тракка «Аэропорт», Хатас сэлиэнньэтин Центральнай уул., «Агрогородок» уонна  Каландаришвили уул., «Больница» сылаас тохтобуллар арыллыахтара.
Ахсынньы 31 күнүгэр диэри Можайскай уул., «Сквер Гагарина», Дзержинскай уул., «Спортивная школа», Семен Данилов уул., «Новинка», Можайскай уул., «Новопортовской», Курнатовскай уул., «Курнатовского», Кулаковскай уул., «Сквер Аммосова».
Бэлиэтээн эттэххэ, куорат баһылыга Евгений Григорьев саҥа сылаас тохтобуллары туруорар туһунан быһаарыыны ылынан, быйыл олунньу ыйга тутуу блогар 20 тохтобулу Дьокуускай уулусса-суол ситимин саҥардан тутуу былааныгар киллэрэллэригэр сорудахтаабыта. Сылаас тохтобуллар киин куорат үлэтин толорууга анаан өрөспүүбүлүкэ бүддьүөтүттэн бэриллибит үбүнэн тутуллаллар. 
Киин куорат былааһа оптуобус тохтобулларыгар сылаас павильоннары үс сыл тухары тутан сүүс ахсааҥҥа тиэрдэр соруктаах. Итини тэҥэ, чугаһынааҕы сылларга куорат оптуобуһун пааркатын саҥардыы уонна уопсастыбаннай тырааныспар аныгы систиэмэтин олоххо киллэрии былааннанар.