02.04.2021 | 14:13

Суруйааччылар айаннара

Суруйааччылар айаннара
Ааптар: Киин Куорат
Бөлөххө киир

Кулун тутар 31 күнүгэр уйгу сирэ Уус Алдан киинигэр – Бороҕоҥҥо, Тойон Мүрү туонатыгар Дьокуускайтан айаннаан тиийбит суруйааччылары киин бибилэтиэкэҕэ арыылаах алаадьынан, кырылыы кыынньар кымыһынан, сиэри-туому тутуһан көрүстүлэр.

Галина Владимировна Аммосова салайааччылаах Уус Алдан улууһун литературнай түмсүүтүн чилиэннэрэ тоҕуоруһа мустубуттара сүргэбитин көтөхтө. Күүтүүлээх ыалдьыттарыгар Уус Алдан улууһун култуураҕа управлениетын, улуустааҕы кииннэммит бибилэтиэкэ тиһигин, улуустааҕы литературнай түмсүү аатыттан "Эҕэрдэ суруктары", "Уус Алдан албан ааттаахтара" уо.д.а. кинигэлэрин үөрүүлээх түгэҥҥэ бэлэх туттардылар.

 Салгыы Галина Аммосова кылгастык түмсүүлэрин үлэтин, инники былаанын билиһиннэрдэ. Ол кэннэ тылы биһиэхэ, ыалдьыттарыгар, салайда.

Биирдиилээн тураммыт айар абылаҥҥа хайдах, хаһан ылларбыппытын кэпсээтибит, хантан хааннаахпытын, кимтэн кииннээхпитин билиһиннэрдибит, долгуйан тураммыт хоһооннорбутун аахтыбыт.

Айар-суруйар аартыкка үктэммит доҕотторбут кэккэ ыйытыктарыгар хоруйдаатыбыт, бэйэбит кинигэлэрбитин бэлэх ууннубут.

 Эҕэрдэ ырыа кэһиилээх кэлбит суруйааччыларбыт Семен Ильич Черноградскай уонна Алексей Михайлович Татаринов - Удьурҕай ымыылаах ырыаларын ыллаатылар.

 Бороҕон орто оскуолатын муусука учуутала, олохтоох мелодист Станислав Николаевич Луковцев баяҥҥа доҕуһуоллаан Уус Алдан улууһун култуура управлениетын сүрүн специалистара Анна Егоровна Федорова, Матрена Николаевна Герасимова эйээрэр куоластарынан ыллаан сүрэхпитин манньыттылар. Винокурова Татьяна Михайловна - Кустук Таана тылларыгар, Станислав  Николаевич Луковцев мелодиятыгар "Уһуктуу" лит.түмсүү гимн ырыатын бары өрө күүрэн тураннар ыллаатылар.Олус долгутуулаах түгэн буолла.

 Салгыы тэрээһиммит иккис чааһыгар сахалыы аһынан томточчу туолбут сандалы тула олороммут литературнай түмсүүлэрин чилиэннэрэ хоһооннорун ааҕалларын, ырыаларын ыллыылларын иһиттибит.

  Бурнашева Ульяна Ивановна - Уйана, биһиги Сойууспут чилиэнэ, хааһахтан хостуур курдук төрөөбүт тылбыт сүмэтин имигэстик туттан этэрин-тыынарын бары сөхтүбүт, эҕэрдэтигэр үөрдүбүт. Салгыы биһиги Сойууспут чилиэнэ Иванова Акулина Михайловна - Бээрийэ кыыһа Хотойук Айгыына бэйэтин үлэтин-хамнаһын кэпсээтэ, "Саҥа хаар" ырыаны ыллаан барыбыт санаабытын көнньүөртэ.

 Галина Аммосова этэринэн, урут "Уһуктуу" лит.түмсүүлэригэр барыта Саха Далбар Хотуттара эрэ  чилиэн эбит буоллахтарына, аны түмсүүлэрэ кэҥээн суруйар-айар саха уоланнара түмсүүгэ киирбиттэр. Онон аат толкуйдуур үлэҕэ тиксибиттэр. Борис Лугинов диэн эдэр уол бэйэтин билиһиннэрдэ, СӨ иһинэн ыытыллар күрэхтэргэ бириистээх миэстэни ылбытын туһунан кэпсээтэ,"Саха санаата" хоһоонун аахпытын болҕойон иһиттибит. Кэскиллээх эдэр уол хоһоонноро түмүллэн кинигэ буолан күн сирин көрүөхтэрин сөбүн эппитин олус сэргээтибит.

 Бары да талааннарынан сөхтөрдүлэр. Ол курдук Мария Михайловна Петухова ыллыырын тыыммакка иһиттибит.

Кэскиллээх эдэр уол Гаврил Пухов, эҕэрдэ тыл этээт, ыллаан барыбытын үөртэ. Татьяна Михайловна Винокурова - Кустук Таана олоҕуттан кэрчик кэмнэрин кэпсээн күлсэн да ыллыбыт, ырыатын болҕойон иһиттибит. Сэргэх көрсүһүүгэ кэлбит доҕотторбут бары эҕэрдэ тылын эттилэр, долгуттулар. Биһиэхэ анаабыт эйэҕэс тылларгыт, баҕа санааҕыт биһигини кынаттыыр, салгыы айа-тута сылдьарбытыгар күүс эбэр.

Онон Валентина Николаевна Шадрина эппитинии, Тойон Мүрү алаастара биһигини айхаллаан көрсүбүттэрэ, чаҕылхай сааскы күн күлүмнүү тыкпыта барыбытыгар өйбүтүгэр-санаабытыгар сүппэт өйдөбүл буолан сүрэхпитин сылаанньыта сылдьыа диэн эрэннэрэбит.

 Тойон Мүрү туонатыгар улааппыт, сайдыбыт биир санаалаах айар-суруйар доҕотторбутугар бары үтүөнү, үчүгэйи, үтүмэн үгүс үөрүүнү баҕарабыт. Айар аартыкка үктэнэн айымньыларгыт күн сирин көрөн истиннэр!

 Тэрээһини иилээн-саҕалаан ыыппыт СР култууратын туйгунугар, Мүрү нэһилиэгин бочуоттаах олохтооҕор, С.С.Васильев - Борогонскай аатынан улуустааҕы киин бибилэтиэкэ ааҕааччыны кытта үлэҕэ отделын сэбиэдиссэйигэр Галина Владимировна Аммосоваҕа барҕа махталбытын этэбит.

Көрсүөххэ диэри!!!

Галина Григорьевна Басылайканова - Кэнтик кыыһа,

СР Суруйааччыларын сойууһун чилиэнэ,

СӨ үөрэҕириитин туйгуна,

РИК "Офсет" менеджерэ

Сонуннар

Ордук ааҕаллар

Полина Победа:  «Дьоллоох буолуҥ олоххутугар, түүлгүтүгэр»
Дьон | 29.02.2024 | 10:00
Полина Победа: «Дьоллоох буолуҥ олоххутугар, түүлгүтүгэр»
Бүгүҥҥү ыалдьыппын улаханнык билиһиннэрэр да наадата суох буолуо. Кинини, өрөспүүбүлүкэ сахалыы тыллаах олохтоохторо ПОЛИНА ПОБЕДА диэн ааттаах хоһоонньуту, социальнай ситим устун билбиттэрэ ыраатта. Полина Пантелеймоновна Находкина хомоҕой тыллаах хоһоонноро элбэх киһи кутун туталлар, махталын ылаллар. Кини ону таһынан имигэс үҥкүүһүт, шпагат түһэр, араас эрчиллиилэри холкутук оҥорор, төбөтүн оройугар турар –...
Волонтер эр дьон. Кинилэр кимнээҕий?
Дьон | 22.02.2024 | 11:20
Волонтер эр дьон. Кинилэр кимнээҕий?
Биһиги волонтердар тустарынан ордук пандемия кэмигэр истибиппит. Кинилэр ыалдьыбыт, кыаммат дьоҥҥо астарын, эмтэрин босхо тиэрдэн биэриигэ, араас соруктарга сылдьыбыттара. Волонтердар ойуур баһаардарыгар эмиэ күүстэрин харыстаабакка үлэлээбиттэрэ.
«Үрүҥ илгэ»: эдэр худуоһунньук Семен Нучеканов быыстапката
Сынньалаңңа | 18.02.2024 | 12:00
«Үрүҥ илгэ»: эдэр худуоһунньук Семен Нучеканов быыстапката
Олунньу 8 күнүттэн “Худуоһунньук дьиэтэ” галереяҕа эдэр худуоһунньук Семен Нучеканов “Үрүҥ илгэ” ааптарыскай быыстапката арылынна.
Дьахтар араастаах буолар эбит
Сынньалаңңа | 23.02.2024 | 14:00
Дьахтар араастаах буолар эбит
Сиимэ уол сааһа ыраатта, Саҥа дьыл саҕана отут биэһин туолбута. Бииргэ үөрэммит доҕотторо оҕо-уруу, дьиэ-уот тэринэн ырааппыттара. Онуоха эбии аҕата, биирдэ эмэ холуочуйдаҕына, чаал курдугунан көрөн олорон, ыал буолбакка сылдьарынан сирэй-харах анньара. Кырдьар сааска кэргэнэ суох соҕотох сылдьыы куһаҕанын өйдөтө сатыыра, ол кэннэ устунан ытаан барара. Ийэлэрэ барахсан ыалдьан, Сиимэ...