Суол өрөмүөнэ графиктан хаалыыта суох баран иһэр

От ыйын 4 күнүгэр Евгений Григорьев Дьокуускай куорат суолун-ииһин өрөмүөнүн хаамыытын кытта билистэ. Ол курдук, баһылык Пирогов уонна Ильменскэй уулуссалар хапытаалынай өрөмүөннэрин таһынан Билибин уулуссатыгар ыытылла турар үлэни бэрэбиэркэлээтэ, диэн иһитиннэрэр Дьокуускай куорат олохтоох дьаһалтатын пресс-сулууспата.

Бэдэрээтчит “Сэттэ” ХЭУ бэрэстэбиитэлэ иһитиннэрбитинэн, бу нэдиэлэҕэ Ильменскэй уулуссатыгар диэри суол бүрүөһүнүн аллараа араҥата ууруллуохтаах.

«Бордюр тааһын туруорабыт, съезтэри оҥоробут. Анараа өттүгэр, ол эбэтэр Сэргэлээхтэн кэлиигэ, 1 километр 100 миэтэрэ усталаах суол бүрүөһүнүн аллараа араҥата тэлгэммитэ. Аспаал үөһээ араҥата ууруллар. Ууну сүүрдэр ханаабалар оҥоһуллар», - диэн бэдэрээтчит бэрэстэбиитэлэ иһитиннэрдэ.

Дьон үлэлиир кэмигэр мэһэйдээбэт курдук суол сүрүн үлэтэ киэһэ 21.00 чаастан сарсыардааҥҥа диэри ыытыллаллара бэлиэтэнэр. Объекка күн аайы 23 үлэһит уонна 13 тиэхиньикэ үлэлиир. Тутуу бэлэмэ 70 %-ҥа тэҥнэһэр.

Ильменскэй уулусса хапытаалынай өрөмүөнүн Чайковскай уулуссатыттан Билибин уулуссатыгар диэри учаастагын бэдэрээтчитэ – “Сахатрасстрой” ХЭУ. От ыйын 4 күнүнээҕи туругунан эргэ аспаал эрбэммит, ууну ыытар лотуоктары олордуу уонна мөлтөх туруктаах буору уларытыы ыытыллыбыт. Үлэ 25 % бэлэм. 

Бэдэрээтчит иһитиннэриитинэн, аспаал ууруута от - атырдьах ыйдарыгар саҕаланыаҕа. Объекка 19 киһи уонна 9 тиэхиньикэ үлэлиир.

“Сахатрасстрой” ХЭУ маны сэргэ Пирогов уулуссатын Петр Алексеев уулуссатыттан Жорницкай уулуссатыгар диэри учаастагар хапытаалынай өрөмүөнүн оҥорор. Билигин ууну ыытар лотуоктар хорууларын хаһаллар, уот баҕаналарын туруораллар, гаас турбатын тардарга бэлэмнииллэр уонна щебень кутуллар. Суол өрөмүөнэ 16 үлэһит уонна 8 тиэхиньикэ күүһүнэн ыытыллар. Тутуу бэлэмэ 70 %-ҥа тэҥнэһэр. 

Бэлиэтээн эттэххэ, Дьокуускай куоракка «Куттала суох уонна хаачыстыбалаах айан суоллара» национальнай бырайыак чэрчитинэн бу сылга 28 саҥа уонна 2 ааспыт сыллартан хаалбыт объект оҥоһуллар. Бу объектар уопсай усталара 34 км 615 м тэҥнэһэр.