Суол сулууспалара муус тоҥоту утары тэрээһиннэри төгүрүк суукканан ыыталлар

«Якутдорстрой» АУо аналлаах тиэхиньикэтэ уонна суол оробуочайдара хаар ыраастааһынын уонна муус тоҥоту утары тэрээһиннэри төгүрүк суукканан ыыталлар. Бу туһунан Уокуруктааҕы дьаһалта пресс-сулууспата иһитиннэрэр.
«Якутдорстрой» АУо тупсаран оҥорууга учаастагын начаалынньыга Елизавета Тимофеева иһитиннэрбитинэн, тротуордары уонна болуоссаттары механическай харбааһын, оптуобус хармааннарын, эргийэ барар суоллары уонна уулуссалар быһа охсуһууларын өрүс кумаҕынан кутуу ыытыллар. 
«Муус тоҥоту утары тэрээһиннэри – кумаҕы кутууну сарсыарда 05.00 чаастан ыытабыт. Итини таһынан, айан суолун уонна уулуссалар бордюрдарын, тротуардары, киирэр суоллары уонна массыыналар тохтуур сирдэрин хаартан ыраастыыбыт. Күн аайы 60-тан 80-ҥа диэри хоммунаалынай тиэхиньикэ тахсар, үлэ икки сменанан – сарсыарда 08.00 чаастан киэһэ 20.00 чааска диэри уонна киэһэ 20.00 чаастан сарсыарда 08.00 диэри ыытыллар», – диэн чуолкайдаата  Елизавета Тимофеева.
Муус тоҥоту утары тэрээһиннэргэ 90-ча киһи үлэлиир. «Якутдорстрой» АУо салалта территориальнай уорганнарыгар кумаҕы тиэйэр, уокуруктарга уонна куорат кытыытыгар 24 кумаҕы мунньар (накопитель) баар. Дворниктар тротуардары, туоруур сирдэри, оптуобус хармааннарын, уулуссалар быһа охсуһууларын кумаҕынан куталлар. 
Промышленнай уокурукка – 12, Губинскайга – 11, Сайсары, Гагаринскай уокуруктарга – 8-тыы, Автодорожнайга – 7, Октябрьскайга, Строительнайга – 6-лыы, Хатас, Маҥан, Тулагы, Табаҕа, бөһүөлэктэригэр – 4-түү, Пригороднайга уонна Мархаҕа – 3-түү, Кангалааска – 2 дворник үлэлииллэр.
Киин уокурук дворниктара кумаҕы куталларын таһынан хаары күрдьэллэр, бөҕү ыраастыыллар, остуолбалартан реклама биллэриилэрин  хастыыллар, уокурук санитарнай туругун көрөллөр.