Суол өрөмүөнүн хантыраактара түһэрсилиннилэр

«Главстрой» МХТ информациятынан, бүгүҥҥү күннээҕи туругунан киин куоракка 28 өрөмүөннэнэр эбийиэк бэдэрээтчиттэрин кытта муниципальнай хантыраактар бары түһэрсилиннилэр диэн иһитиннэрдэ Олохтоох дьаһалта пресс-сулууспата. 
Быйыл 28 саҥа уонна 3 кылгас өрөмүөннэнэр суоллар уһуннара 34 км 615 м тэҥнэстэ. Муниципальнай хантыраак уопсай суумата – 2 млрд тахса солкуобай. 
«Главстрой» МХТ иһитиннэриитинэн, бэдэрээтчиттэрин кытта түһэрсиллибит хантыраактарга олоҕуран өрөмүөҥҥэ, саҥардан оҥорууга, тутууга уонна хапытаалынай өрөмүөҥҥэ алта бэдэрээтчит үлэлиэҕэ – «РИК Автодор» АУо, «Дорстрой» ХЭТ, «Сахатрасстрой» ХЭТ, «Сэттэ» ДРСУ, «Альянс-2005» ХЭТ, «Дороги Саха» САУо.
Бүгүҥҥү күҥҥэ Дьокуускай куоракка суол үлэтэ Ленина проспегар, Билибин, Ильменскай, Каландаришвили, Пирогов, Труд, Поярков уулуссаларыгар уонна Пригороднай сэлиэнньэтин Центральнай уулуссатыгар ыытыллар.
Бэлиэтээн эттэххэ, 2022 сылга өрөмүөннэнэр суоллар испииһэктэригэр Ильменскай, Очиченко, Пирогов, Труд, Каландаришвили, Федор Попов, Птицевод, Тимирязев, Яков Потапов, Маяковскай, Уустаах-Избеков, Мерзлотнай, Три Сосны, Авиатордар, Поярков, Билибин уулуссалара, Щорс күөлүн устунан барар суол, Энергетиктэр уонна Глухой быстах туора уулуссалар, речевой оскуолаҕа чугаһыыр суол, Кангалаас дьоҕус оройуонугар Нагорнай, Табаҕа сэлиэнньэтигэр Каландаришвили (2 учаастак), Пригороднай сэлиэнньэтигэр Центральнай, Марха дьоҕус оройуонугар Мархинскай уулуссалар, Хатас сэлиэнньэтигэр элбэх оҕолоох ыал олорор кыбаарталыгар чугаһыыр суол тутуута, итиэннэ Ленин уонна Октябрьскай уулуссалар өрөмүөннэрэ, Киллэм сэлиэнньэтигэр Уваровскай уулуссата, Дьокуускай куорат Мерзлотнай уулуссатыгар турар Кардиологическай диспансерга чугаһыыр суол тутуута киирэн сылдьаллар. 
2023 сылга түмүктэниэхтээх быстах эбийиэктэр: Ленин проспегын Хабаров уулуссатыттан Краснояров уулуссатыгар диэри учаастакка (Дзержинскэй уулуссатыттан Хабаров уулуссатыгар уонна Кулаковскай уулуссатыттан Краснояров уулуссатыгар диэри) хапытаалынай өрөмүөнэ, Поярков уулуссатын Дзержинскэй уулуссаттан Октябрьскай уулуссатыгар диэри учаастакка өрөмүөнэ, Бабушкин уулуссатын Советскай Армия 50 сыла уулуссаттан Очиченко уулуссатыгар диэри учаастакка хапытаалынай өрөмүөнэ.
Тутар-таҥар үлэлэри балаҕан ыйын 1 күнүгэр диэри, оттон бөдөҥ эбийиэктэргэ – 2022 сыл алтынньы ый түмүктэниэр диэри бүтэрэр былаан баар.