Суол хаһаайыстыбатын үлэһиттэрин чиэстээтилэр

Алтынньы 19 күнүгэр Дьокуускай куорат Уокуруктааҕы дьаһалтатыгар суол хаһаайыстыбатын үлэһиттэрин Күнүгэр анаммыт үөрүүлээх тэрээһин ыытылынна. Суол үлэһиттэрин идэлээх бырааһынньыктарынан куорат баһылыга Евгений Григорьев эҕэрдэлээтэ.
Бырааһынньыктааҕы тэрээһиҥҥэ Саха Өрөспүүбүлүкэтин тырааныспарга уонна суол хаһаайыстыбатыгар миниистирэ Владимир Сивцев, Дьокуускайдааҕы куорат Дууматын бэрэссэдээтэлин эбээһинэһин толорооччу Евдокия Евсикова, Уокуруктааҕы дьаһалта структурнай салааларын үлэһиттэрэ уонна ыҥырыылаах ыалдьыттар кытыннылар. 
Санатар буоллахха, 2021 сыл куорат суолун салаатыгар ураты сылынан буолла,  «Куттала суох уонна хаачыстыбалаах» суоллар национальнай бырайыак чэрчитинэн куоракка 58 км уопсай уһуннаах суол тутуллар уонна өрөмүөннэнэр. 
Куорат баһылыга Евгений Григорьев суол хаһаайыстыбатын үлэһиттэригэр эҕэрдэ тылыгар суол тутуута куорат инфраструктуратын сайдыытыгар дьоһун суолталааҕын уонна суол үлэһиттэрэ күн ахсын киэҥ хабааннаах уонна уустук үлэҥи оҥороллорун бэлиэтээтэ. 
«Төһө да пандемиянан сибээстээн уустук усулуобуйа буолбутун иһин, суолу, тырааныспар инфраструктуратын эбийиэктэрин тутуу уонна өрөмүөннээһин биир да күҥҥэ тохтообото. Бары тэрилтэлэр,  «Куттала суох уонна хаачыстыбалаах» суоллар национальнай бырайыак олоххо киирэр соругун ситиһээри, штатнай эрэсииминэн үлэлииллэр. Хас биирдии тутуллубут эбийиэк – бу эйгэ үлэһиттэрин күннээҕи түбүктэрин түмүгэ», – диэн бэлиэтээтэ Евгений Григорьев.
Саха Өрөспүүбүлүкэтин тырааныспарга уонна суол хаһаайыстыбатыгар миниистирэ Владимир Сивцев суол хаһаайыстыбатын үлэһиттэригэр махталын биллэрдэ. «Аҥардас быйылгы сылга куорат суолун үлэһиттэрэ 58 км суолу өрөмүөннүүллэр. Кэнники сылларга Дьокуускайга 100 км тахса суол өрөмүөннэннэ. Куорат уокуругун устуоруйатыгар маннык көрдөрүү кэнники уон сылга суоҕа. Инники өттүгэр эмиэ маннык улахан кэриҥнээх үлэ күүтэр», – диэтэ  Владимир Сивцев.
Миниистир «Суол хаһаайыстыбатын бочуоттаах үлэһитэ» түөскэ анньынар бэлиэни суол хаһаайыстыбатын эйгэтигэр өҥөтүн иһин «Главстрой» МХТ дириэктэригэр Алексей Варламовка туттарда. 
Дьокуускайдааҕы куорат Дууматын бэрэссэдээтэлин эбээһинэһин толорооччу Евдокия Евсикова суол эйгэтэ Арассыыйа тырааныспарын систиэмэтин уонна экономикатын сүрүн чааһынан буоларын бэлиэтээтэ. «Бүгүн ханнык баҕарар нэһилиэнньэлээх пуун олоҕун таһымын суолларын туругуттан көрөн быһаараллар. Үчүгэй суоллардаах буоллахтарына, дьон үөрүүнү кытта итинник куораттарга сылдьар. Суол хаһаайыстыбатын үлэтин түмүгэ тута харахха быраҕыллар. Куораппытыгар сылын аайы суолларбыт тупсан иһэллэр. Ити эһиги түбүктээх үлэҕит түмүгэ. Куорат олохтоохторун,  Дьокуускайдааҕы куорат Дууматын уонна тус бэйэм ааппыттан үчүгэй, хаачыстыбалаах суолларбыт иһин махтанабын», – диэтэ  Евдокия Евсикова.
СӨ киин куоратын социальнай-экономическай сайдыытыгар кылааттарын иһин уонна идэлээх Күннэринэн суол хаһаайыстыбатын үлэһиттэригэр үөрүүлээх быһыыга-майгыга куорат баһылыгын грамоталарын, Дьокуускай куорат Уокуруктааҕы дьаһалтатын Бочуоттаах грамоталарын уонна куорат Дууматын уонна Уокуруктааҕы дьаһалта махтал суруктарын туттардылар.