Суол быраабылатын кэһээччилэргэ балаһыанньа кытаатар

От ыйын 1 күнүттэн суол быраабылатын кэһээччилэр тустарын информацияны такси агрегатордара уонна каршеринг хампаанньалара биир кэлим дааннайдар базаларыгар киирэн көрөллөрө көҥүллэниэҕэ.

Суол быраабылатын хаста даҕаны кэспит суоппардар тустарынан информацияны түмэр систиэмэни Арассыыйаҕа айан таһаардылар. «Витрина данных ГИБДД» көмөтүнэн ГИБДД үлэһиттэрэ суолга, такси агрегатордара, каршеринг уонна да атын хампаанньалар суоппар быраабын, суолга айанныырыгар быраабылалары төһө тутуһарын, бэрээдэгин тута бэрэбиэркэлиир кыахтаныахтара.

Суол быраабылатын элбэхтик кэспит дьон каршеринг көмөтүнэн массыына уларсан ыыталлара, таксилаан дьону таһаллара, таһаҕас тиэйэллэрэ бобуллуон сөп. “Витринаҕа” Арассыыйа гражданнара эрэ буолбакка, тас дойдуттан киирбит суоппардар тустарынан информация эмиэ баар. Маны таһынан, анал сайаапка түһэрбит хампаанньалар эмиэ “Витринанан” туһанар кыахтаныахтара.