Строительнай уокурукка саҥа воркаут балаһаакка арылынна
Куорат күнүгэр аналлаах биир бэлиэ түгэнинэн Халтурин уул., 14/4-гэр саҥа воркаут балаһаакка үөрүүлээх быһыыга-майгыга аһыллыыта буолла. Мантан ыла уокурук олохтоохторо чэбдик салгыҥҥа спордунан дьарыктаныахтара.
Киин куорат баһылыга Евгений Григорьев саҥа балаһааккалары арыйыы Куорат күнүн көрсө үтүө үгэскэ кубулуйбутун бэлиэтээтэ уонна:
«Воркаут балаһааккалар Дьокуускайга дьон-сэргэ талаһар, физкултууранан дьарыктанар уонна бэйэ-бэйэлэрин кытта алтыһар сирдэрэ буолла. Физкултуура уонна спорт – чөл уонна бөҕө турук төрдө, салгыы бу курдук спордунан күргүөмнээхтик дьарыктанар усулуобуйаны тэрийэн иһиэхпит», – диэтэ.
Бэлиэтээн эттэххэ, бу бырайыак «2020-2024 сылларга Дьокуускай куорат сиригэр-уотугар аныгы куорат эйгэтин тэрийии» муниципальнай бырагыраама иитинэн олоххо киирдэ. Физкултуураны уонна спорду өйүүр, нэһилиэнньэни чөл олоххо көҕүлүүр сыаллаах спорт уонна воркаут балаһааккалары тупсаран оҥоруу салҕанар. Манна даҕатан эттэххэ, түөрт сыл иһигэр барыта 35 воркаут балаһаакка туруорулунна.
Хаартыска: Олохтоох дьаһалта пресс-сулууспата
Сонуннар
Ордук ааҕаллар
