Строительнай уокурукка көҥүллэммэтэх бөх кутар сир булулунна

Олохтоох дьаһалта пресс-сулууспата иһитиннэрбитинэн, киин куорат Строительнай уокуругар көҥүллэммэтэх бөх кутар сир суох гынылынна. Уокурук Управатын дьаһалынан, «Дьокуускайдааҕы анал стоматология киинэ» СӨ САТ Свердлов уулуссатын 3/2 №-тэн мунньуллубут бөҕү-саҕы тиэйдэ. Росреестр дааннайдарынан, сир учаастагын бас билээччинэн үөһэ этиллибит стоматология киинэ буолар. 
Строительнай уокурук Управатын салайааччыта Василий Рязанскай иһитиннэрбитинэн, стоматология киинэ итиннэ соторутааҕыта Федор Попов уулуссатыттан көһөн кэлбит.
«Урукку онкологическай диспансер дьиэтигэр билигин анал стоматология киинэ үлэлиир. Куорат олохтоохторун үҥсүүтүнэн бөҕү суһаллык бэнидиэнньиккэ хомуйдулар. Бүгүҥҥү күннээҕи туругунан бөҕү тиэйэргэ «Якутскэкосети» тэрилтэни кытта дуогабар баар», – диэтэ  Василий Рязанскай.
Манна даҕатан эттэххэ, РФ бырабыыталыстыбатын 2016 сыл сэтинньи 12 күнүнээҕи 1156 №-дээх уурааҕар олоҕуран, сир учаастагын бас билээччилэрэ булгуччу хомунаалынай кытаанах бөҕү бэйэлэрэ, эбэтэр регионнааҕы операторы кытта дуогабар түһэрсэн тиэйтэриэхтээхтэр.