Строительнай уокурукка 2021 сылга 245 дьиэ хаарбах туруктааҕынан билиниллибит

Ол туһунан СӨ Баһылыгын Укааһын бырайыагар киирбит киин куорат 2022-2032 сыллардааҕы социальнай-экономическэй сайдыытын стратегиятын дьүүллэһии чэрчитинэн Строительнай уокурук олохтоохторун кытта көрсүһүүгэ куорат баһылыга Евгений Григорьев иһитиннэрдэ. 
«2032 сылга диэри бары эргэ, хаарбах туруктаах дьиэлэри суох оҥорон, 400 сыллаах үбүлүөйү куораппытын тупсаран көрсөөрү былаанныыбыт», – диэтэ куорат баһылыга.
Итини сэргэ быйылгыттан «Мой двор» бырайыак үлэҕэ киирэн, 5 сыл иһигэр 150 тиэргэн территорията тупсарыллыахтаах. 
«Быйыл Ил-Дархан уурааҕынан эбии 15 тиэргэни тупсаран оҥорууга 150 мөлүйүөн солкуобай бэриллибитэ. Инньэ гынан, 30 тиэргэни тупсарабыт уонна көҕөрдөбүт. Итинтэн 15 тиэргэнэ эһиил оҥоһуллан бүтүөхтээх. Сыл бүтүөр диэри 15 территорияҕа үлэ түмүктэниэҕэ. 2022 сылга 45 тиэргэни оҥоруохтаахпыт», – диэн иһитиннэрдэ куорат баһылыга.
«Мой двор» бырайыак чэрчитинэн Строительнай уокурукка быйыл Лермонтов уул., 23/2-23/3 уонна 25/2 дьиэлэрин тиэргэннэрэ өрөмүөннэнэр. Уокурукка 2025 сылга диэри 22 тиэргэн территорията өрөмүөнэ оҥоһуллар.  
Строительнай уокурук общественнига, көхтөөх олохтооҕо Екатерина Емелина Лермонтов уул., 23/2-23/3 дьиэлэрин олохтоохторун аатыттан өрөспүүбүлүкэ уонна куорат салалтатыгар махтанна. «Биһиги, олохтоохтор, тиэргэммитигэр ыытыллар үлэни кэтээн көрдүбүт, хайдах курдук салалтаттан саҕалаан оробуочайдарга тиийэ эппиэтинэстээхтик үлэлииллэрин. Тиэргэммит толору тупсарылынна, кэрэтийдэ. Үлэҕит уонна куорат олохтоохторун санаатын истэргит иһин махталбын тиэрдэбин», – диэтэ  Екатерина Емелина.
Киин куорат 2022-2032 сылларга социальнай-экономическэй сайдыытын бырайыагын чэрчитинэн Строительнай уокурукка 2025 сылга диэри Пирогов уулуссатыгар 180 миэстэлээх 4 №-дээх орто коррекционнай оскуола, Якутскай уулуссаҕа (2А кыбартаал) 240 миэстэлээх оҕо уһуйаана тутуллара, уулусса сырдатыытын 27 ситимэ (805 тирээбил уонна 805 лаампа) туруоруллара, 22 тиэргэн территорията тупсарыллара, 36 элбэх кыбартыыралаах дьиэ көһөрүллэрэ, 5 спортивнай воркаут-балаһаакка уонна 2 сылаас тохтобул туруоруллара былааннанар. 
Быйыл тутуу сезона бүтүөр диэри «Горснаб» МУТ базатын территориятыгар киин куорат үөрэҕириитин тэрилтэлэригэр бородууктаны тарҕатар логистическай киин  тутуута түмүктэниэхтээх. 
Баһылыгы кытта көрсүһүүгэ Строительнай уокурук олохтоохторо территория сайдыытын, социальнай, үөрэҕирии, уопсастыбаннай эбийиэктэр өрөмүөннэрин, уулусса уутун сүүрдүү схематын оҥоһуутун, оптуобус сылаас тохтобулларын, суол өрөмүөнүн, оскуола уонна оҕо уһуйааннарын территорияларын тупсаран оҥоруу, элбэх оҕолоох ыалларга сир учаастактарын үллэрии туһунан ыйыталастылар уонна сиһилии хоруйдары ыллылар. 
Нэһилиэнньэни кытта көрсүһүүгэ куорат баһылыгын сэргэ Гагаринскай быыбардыыр уокурук депутата Иван Данилов, баһылык солбуйааччылара, структурнай салаалар уонна муниципальнай тэрилтэлэр салайааччылара кытыннылар.