Строительнай уокурук Управата аһымал аахсыйаҕа кытынна

Управа салайааччыта Андрей Петров бэлиэтээбитинэн, маннык, оҕолорго үтүөнү, үөрүүнү-көтүүнү, саҥа дьыллааҕы настырыанньаны тиэрдэр аахсыйа наһаа наадалаах.

Аахсыйа чэрчитинэн, ким баҕалаах, оҕо дьиэлэрин иитиллээччилэрин уонна коррекционнай оскуола үөрэнээччилэрин баҕа санааларын толоруохтарын сөп. Тэрээһиҥҥэ кыттарга оҕо аата суруллубут аккырыыкканы талан баран, ол оҕоҕо саҥа дьыллааҕы бэлэх оҥоһуллар. 

Санатар буоллахха, аахсыйа сэтинньи 20 күнүттэн ахсынньы 29 күнүгэр диэри ыытыллар. Быйыл «Үтүө санаа харыйата» аһымал аахсыйа Дьокуускайга «Бубль-Гум» маҕаһыын икки филиалыгар ыытыллар: Кальвица уул., 14/5 уонна Дзержинскэй уул., 71. Ким баҕарар, атыыласпыт бэлэҕин кытта хаартыскаҕа түһэн, «ЁлкаДобра2024» хэштэгтээх социальнай ситимнэргэ угуон сөп.