«Стерх» спорт комплекса «Азия оҕолоро» Оонньуулар кыттыылаахтарын көрсөргө бэлэм

VIII-с «Азия оҕолоро» Оонньуулар сорох күрэхтэһиилэрэ Гагарин уокуругар баар «Стерх» спорт комплексыгар буолуохтара.
Куорат баһылыга Евгений Григорьев бэлиэтээбитинэн, спорт комплексын хапытаалынай өрөмүөнэ икки сыл устата ыытыллыбыт. Ол курдук, киирэр аан үрдүгэр навес оҥоһуллубут, саала уонна административнай дьиэ үрдүлэрэ уларытыллыбыттар, истиэнэлэрэ өрөмүөннэммит. Маны сэргэ оонньуур саала прожектора, паркета уларытыллыбыт.

Бүгүҥҥү күҥҥэ былааннаммыт үлэ барыта түмүктэнэн, эбийиэк «Азия оҕолоро» Оонньуулар кыттыылаахтарын көрсөргө бэлэм. 
Оттон Оонньуулар аастахтарына, манна ДЮСШ үлэлиэҕэ. Саҥардыллыбыт душ кабиналарлаах, уларыттар хостордоох, туалеттаах, куттал суох буолуутун хааччыйар систиэмэлээх бэртээхэй эбийиэккэ оҕолорбут дуоһуйа дьарыктаныахтара турдаҕа.