04.12.2021 | 17:00

Спорт сонуннара

Спорт сонуннара
Ааптар: Баһылай Посельскай
Бөлөххө киир

Москва аннынааҕы Долгопруднай куоракка түмүктэммит пауэрлифтиҥҥэ аан дойду Кубогар уонна силовой көрүҥнэргэ Хаҥалас Үөдэйиттэн төрүттээх-уустаах Евгений Самсонов 60 кг чаҕылхайдык кытынна. Сытан эрэ штанганы өрө анньыыга уонна стритлифтиҥҥэ кыһыл көмүс мэтээллэри ылаттаата, итиэннэ Арассыыйа спордун маастара буолары ситистэ.  Дэгиттэр сайдыылаах Евгений Самсонов “Небесная река” киин ушуга уонна цигуҥҥа тренеринэн үлэлиир. Эрдэ Арассыыйаҕа чемпионнаабыта, Арассыыйа рекордун олохтообута.

Олимпийскай эрэл училище иитиллээччитэ Алина Готовцева буулдьанан ытыыга 17-гэр диэри саастаах оҕолорго Татарстаҥҥа буолан ааспыт Арассыыйа чемпионатыгар пневматическай бэстилиэккэ үрүҥ көмүс мэтээли ылла. Алина Готовцеваны тренер Александр Сотников эрчийэр.

Екатеринбурга буолан ааспыт 21-гэр диэри саастаах Арассыыйа дзюдоҕа чемпионатыгар Карина Ефимова 52 кг уонна 48 кг Аина Моисеева кыһыл көмүс, 44 кг Саина Петрова үрүҥ көмүс мэтээллэри ылаттаатылар. Бу көрдөрүүлэринэн үһүөн Арассыыйа сүүмэрдэммит хамаандатыгар киирдилэр. Р. М. Дмитриев аатынан Олимпийскай эрэл училищетыгар дзюдоистка кыргыттары тренер Дамдиндорж Гомбодорж эрчийэр. 

Пауэрлифтининэн дьарыктанар Мэҥэ Хаҥалас адаптивнай спорка күүстээх ыччата Айаал Сивцев Екатеринбурга Европа ыччаттарын күрэхтэһиитигэр 53 кг кытынна уонна 105 кг ыйааһыннаах штанганы сыыйа өрө анньан кыайыылааҕынан таҕыста. Маҕан орто оскуолатын физкультураҕа учуутала Иннокентий Григорьев 70 саастаах бэтэрээннэргэ эмиэ классическай жимҥэ Европа чемпионун үрдүк аатын ылары ситистэ.

 

Ушуга Москваҕа буолан ааспыт Арассыыйа Кубогар Покровскайтан 35-н үөһэ саастаахтарга Антонина Иванова тайцзиюань көрүҥэр икки кыһыл көмүс мэтээллэннэ, тренерэ Эдгар Тобуков. Дьокуускайтан 12-14 саастаахтарга Анна Романова, 18-35 саастаахтарга Каролина Егорова (тр. Василий Самосонов) иккис миэстэлэри ылаттаан, маастарга кандидат нуорматын толордулар. Анна Романова, Туйаара Корякина дуйлянь тацзицюань көрүҥҥэ бастаатылар. 12-14 саастаах уолаттарга Аркадий Прокопьев уонна Владислав Эртюков кыһыл көмүс мэтээллэри ыллылар.  Владислав Панов үрүҥ көмүс мэтээлгэ тигистэ. 

 

Остуол тенниһигэр оонньуур оҕолор Новосибирскайга буолбут Бүтүн Арассыыйатааҕы “Start Line” талааннаах оҕолор турнирдарын кыайдылар уонна Арассыыйа остуол тенниһигэр Федерациятын официальнай күрэхтэһиилэрин халандаарыгар киллэрилиннилэр. 12-14 саастаах уолаттарга Чурапчы Хатылытыттан Изот Кривошапкин чаҕылхай оонньуунан 90-н тахса утарсааччытын кэннигэр хааллартаан, бастакы миэстэни ылла. Талааннаах теннисист уолу аҕата Геннадий Кривошапкин эрчийэр. 15-17 саастаах кыргыттарга Амма Эмиһиттэн Анита Ноговицына бастаата. Тренердэрэ Валентин Николаев уонна Василий Румянцев. 

Саха сирин сүүмэрдэммит хамаандатын гимнасткалара Ковров куоракка ыытыллыбыт Бүтүн Арассыыйатааҕы “Аскона спорт” күрэхтэһиилэригэр миэстэлэстилэр. 12 уонна 13-14 саастаах гимнаст кыргыттар мээчиктээх уонна скакалкалаах көрүҥнэргэ сахалыы национальнай хамсаныылары сонуннук, кыраһыабайдык оҥордулар. Дьүүллүүр сүбэ саха гимнасткаларын түһүлгэҕэ тахсыыларын визитнэй карточка быһыытынан ылынан, үрдүктүк сыаналаатылар. Гимнастка кыргыттары тренер Татьяна Шишигина эрчийэр.

 

Саха Өрөспүүбүлүкэтин спорка миниистирэ Иннокентий Григорьев уонна  Арктическай государственнай агротехнологическай университет ректора Константин Кривошапкин физическэй культура уонна спорт эйгэтигэр, ол иһигэр адаптивнай спорка, бииргэ үлэлээһин Сөбүлэһиитин түһэристилэр. Үөрэтэр-методическай, научнай-чинчийэр үлэ хайысхаларыгар, физкультура уонна спорт исписэлиистэрин, кадры бэлэмнээһиҥҥэ болҕомто күүһүрүөҕэ. Устудьуоннар спортара сайдарыгар, физкультура-спорт маассабаһын үрдэтиигэ  кыахтар үөскэтилиннилэр.

 

“Хас биирдии оҕо ситиһиитэ” Федеральнай бырайыак чэрчитинэн ыытыллыбыт куонкуруска бастааннар, спорка солбугу бэлэмниир Өрөспүүбүлүкэ киинэ ботуччу сыаналаах Грант ылбыта. Граҥҥа олоҕуран, стендэбэй ытыы, буулдьанан ытыы, оҕунан ытыы, дзюдо, дуобат, саахымат уонна чэпчэки атлетика көрүҥнэригэр аналлаах спортивнай оборудованиелар номнуо “Дохсун” спорткомплекска таҥыллан туруорулуннулар. Спордунан дьарыктанарга бэртээхэй усулуобуйа баар буолла.
Үөскэтиллибит кыаҕы көдьүүстээхтик туһанар инниттэн, спорка солбугу бэлэмниир Өрөспүүбүлүкэ спорка киинин дириэктэрэ Василий Егоров уонна Бэрдьигэстээх сэлиэнньэтин уонна Покровскай куорат Спортивнай солбукка оҕо спортоскуолаларын дириэктэрдэрэ Роман Пахомов уонна Александр Куприянов бииргэ үлэлээһин Дуогабарын түһэристилэр. Дуогабар сүнньүнэн “Дохсун” спорткомплексыгар туруоруллубут саҥа спортивнай оборудованиеларга дьоҕурдаах оҕолор, тренердэр түмсэн бииргэ эрчиллиэхтэрэ, маастарыстыбаларын үрдэтиэхтэрэ.  

 

Өрөспүүбүлүкэ олохтоохторо ГТО нуормаларын көхтөөхтүк туттараллар. Сунтаар улууһун салайааччылара кыһыл көмүс значоктарга туттарбыттара кэрэхсэбиллээх. Баһылык Анатолий Григорьевка, улуус физическэй культураҕа уонна спорка отделын начальнигар Семен Павловка, Алквиад Исидорович Иванов аатынан Олимпийскай эрэл оҕо спортоскуолатын дириэктэригэр Денис Даниловка Арассыыйа спорка миниистирэ илии баттааһыннаах дастабырыанньалары уонна кыһыл көмүс бэлиэлэри Сунтаар улууһун баһылыгын социальнай политикаҕа солбуйааччы Гаврил Еремеев үөрүүлээх быһыыга-майгыга туттартаата. Салайааччылар тус бэйэлэринэн чэгиэн-чэбдик сылдьарга, чөл олоххо ыҥыраллара үтүө холобур. ГТО нуормаларын туттаран, барыта 49 киһи араас солотуулаах бэлиэлэри ыллылар. 

Сонуннар

Ордук ааҕаллар

Дьоҕур-талаан арыллыыта
Спорт | 26.01.2023 | 18:00
Дьоҕур-талаан арыллыыта
Дьиҥинэн, Орто дойдуга кэлбит киһи барыта туохха эрэ дьоҕурдаах, талааннаах. Дьэ, ол арыллара, туттуллара дэбигис кыаллыбат. Ону үрдүк үөһээ айыыларбыт бэйэлэрэ быһааран эрдэхтэрэ. Биллэн турар, улаханнык сыраластахха, күнү-дьылы бараатахха, сүрэхтээх-бэлэстээх, туруу үлэһит, айылҕаттан айдарыылаах буоллахха эрэ дьоҕур, талаан кэлиэн сөп. Дьөгүөр Картузов, дьэ, кырдьык, айылҕаттан хатаҕаламмыт киһи. Тыа киһитин сиэринэн...
Сардаана Токоемова:  «Иистэн дуоһуйууну ылабын...»
Дьон | 28.01.2023 | 16:00
Сардаана Токоемова: «Иистэн дуоһуйууну ылабын...»
Иис сахаларга урут-уруккуттан хааммытыгар баар. Билигин биһиги ортобутугар талааннаах иистэнньэҥнэр, норуот маастардара аҕыйаҕа суохтар. Кустуктуу субуллар оһуор быысапкалары, сахалыы тыынынан илгийэр кылтан, сиэлтэн оҥоһуктары, туостан көбүөрдэри, сэлээппэлэри, халадаай былаачыйалары, оноолоох соннору, хаһыаччыктары о.д.а. саха дьахталлара ис сүрэхтэриттэн тигэллэр. Бу тигиилэргэ төһөлөөх дууһа сылааһа ууруллубута буолуой диэн киһи сөҕө эрэ саныыр....
Мөлүйүөҥҥэ тиийэ иликпит
Сонуннар | 21.01.2023 | 17:00
Мөлүйүөҥҥэ тиийэ иликпит
Сахастат 2022 сыл түмүгэр 2021 сыллаахха ыытыллыбыт (2020 сыллаахха ковид ыарыынан сибээстээн көспүтэ) нэһилиэнньэ биэрэпиһин барыллааһын түмүгүн таһаарбыта.  Саха сирин нэһилиэнньэтин ахсаана: 995,7 тыһ. киһи  (2022 сыл тохсунньу 1 күнүгэр 992 115 киһи этэ)
«Прометей» оскуолатыгар сахалыы иитиини туруорсар төрөппүт кэккэтэ кэҥиир
Куорат олоҕо | 01.02.2023 | 17:00
«Прометей» оскуолатыгар сахалыы иитиини туруорсар төрөппүт кэккэтэ кэҥиир
Дьокуускай куорат историятыгар аан бастаан 990 миэстэлээх улахан оскуола аны күһүн үлэҕэ киириэхтээх.  990 миэстэ диэн бырайыактаммытынан уйунар кыаҕа буоларын өйдүөххэ наада. Киин куораппытыгар миэстэ тиийбэт кыһалҕата баарын тухары оскуолаларбыт 2-3 төгүл ноҕоруускалаах, иккилии симиэнэнэн үлэлии олоруохтара турдаҕа. Онон бу саҥа оскуолаҕа балтараа тыһыынчаҕа тиийэ оҕо үөрэнэрэ буолуо диэн барыллаан...