27.12.2021 | 18:30

Спорт сонуннара

Спорт сонуннара
Ааптар: Киин Куорат
Бөлөххө киир

Швеция Вестерос куоратыгар түмүктэммит Европа ыччаттарын пауэрлифтиҥҥэ чемпионатыгар Үөһээ Бүлүүттэн Богдан Прокопьев 120 кг үөһэттэн үөһэни үктүүр саамай ыарахан ыйааһыннаахтарга штанганы санныгар сүгэн баран олорон турууга (приседка) 350 кг, үс көрүҥ түмүгүнэн 872,5 кг ылан, үһүс миэстэҕэ тигистэ. Богдан маны сэргэ Арассыыйа ыччаттарыгар бэйэтин икки рекордун тупсарда.

Черногория Будва куоратыгар буолан ааспыт кикбоксиҥҥа ыччаттар ортолоругар Европа чемпионатын призердарын Бүлүүгэ чиэстээтилэр. История учуутала, энтузиаст-тренер Эдуард Халабышев эрчийэр иитиллээччилэрэ, Донской аатынан 2 № орто оскуола онус уонна тохсус кылааһын үөрэнээччилэрэ Надежда Павлова уонна Харысхан Колтовской үрүҥ көмүс уонна боруонса мэтээллэри аҕалтааннар, бииргэ үөрэнэр оҕолорун, учууталларын үөртүлэр.

Дагестан Хасавюрт куоратыгар XIX-XX үйэлэр уһулуччулаах бөҕөстөрүн кэриэстэригэр ыытыллыбыт норуоттар икки ардыларынааҕы көҥүл тустуу турнирыгар Сахабыт сирин бөҕөстөрө икки мэтээлгэ тигистилэр. 70 кг Виктор Рассадин дагестанец Магомед Гаджиевы 11:0, Орозбек Токтомамбетовы 6:0, кабардинец Анзор Закуевы 11:1, финалга Европа чөмпүйүөнүгэр дагестанец Курбан Шираевка “кириэс” албаска түбэһэн ыраас техническэйинэн баһыйтаран үрүҥ көмүс, 57 кг Алексей Копылов үһүс миэстэни былдьаһыыга игирэтин аҥаарын Петр Копылову баһыйа тутан боруонса мэтээллэри ылаттаатылар. Бу ыйааһыҥҥа Дагестан бөҕөстөрө Абубакар Муталимов уонна Магомед Абдурахманов бастакы-икки миэстэлэннилэр.

 

“Модун” спорткомплекска түмүктэммит Федор Дегтярев кэриэһигэр мас тардыһыыга Өрөспүүбүлүкэ абсолютнай чөмпүйүөнүн аатын эр дьон 95 кг диэри 17 буолан, онтон дьахталлар төрдүө буолан муҥутуур ыйааһыҥҥа былдьастылар. Дьахталларга номоххо киирбит Амма мадьыныта Анатолий Баишев төрөппүт кыыһа эдэркээн Татьяна Баишева финалга Томпо оройуонуттан аан дойду чөмпүйүөҥкэтин Ирина Севрюгу 2:0 хотто. Хатыһыылаах, кытаанах киирсиилэр түмүктэринэн эр дьоҥҥо финалга Уус Алдантан аан дойду үс төгүллээх чөмпүйүөнэ Павел Черноградскай уонна Ленскэйтэн Манчаары оонньууларын муҥутуур чөмпүйүөнэ Иннокентий Федоров утарыта тахсыбыттарыгар 2:1 ахсаанынан Иннокентий Федоров кыайыыны ситистэ.

Өссө биир бэрт сэргэх тардыһыылар 75 кг диэри буоллулар. Ону 52 кыттааччы суруттарбыта да көрдөрөр. Кыайыыны, утарсааччыларын барыларын хотуталаан, Уус Алдан эдэр, кэскиллээх мадьыныта Семен Ануфриев ылла. Абсолютнай чөмпүйүөннэр  квадроциклларынан наҕараадаланнылар.

 

Хабаровскайга буолан ааспыт Бүтүн Арассыыйатааҕы “Метелица” чэпчэки атлетика күрэхтэһиитигэр спортивнай оскуолалар 18-гар диэри саастаах иитиллээччилэрэ илин-кэлин түһүстүлэр. Сахабыт сириттэн Алданнааҕы спортоскуола иитиллээччилэрэ Александра Лаврентьева 1000 м сүүрүүгэ биэтэккэ үсүһүнэн кэллэ, үрдүгү ойууга Владислав Химченко иккис миэстэлэннэ. Мэҥэ Хаҥаластан Элла Сергучова 3000 м үһүс буолла. Намтан тренер Николай Кейметинов иитиллээччилэрэ Айтал Ощепков 1000 уонна 3000 м кыһыл көмүс уонна үрүҥ көмүс, Ангелина Иванова үстэ төхтөрүйэн ойууга үрүҥ көмүс мэтээллэри ылаттаатылар. Чурапчы спортоскуолатыгар тренер Иван Чиркоевка эрчиллэр Таатта ыччата Данил Андросов үстэ төхтөрүйэн ойууга уонна уһуну ыстаныыга икки кыһыл көмүс мэтээли ылан, бастыҥ көрдөрүүлэри ситистэ. Нам оҕо спортоскуолата “Метелица” Бүтүн Арассыыйатааҕы күрэхтэһиигэ хамаанданан түмүккэ бастаата уонна Кубогынан наҕараадаланна.

 

Грузия киин куоратыгар Тбилисигэ Адаптивнай спорт сүһүөхтэринэн хааччахтаах спортсменнар ортолоругар Европа пауэрлифтиҥҥэ чемпионатыгар 54 дойдуттан 450 спортсмен кытынна. Сахабыт сириттэн Арассыыйа уонна Европа чөмпүйүөннэрэ Владимир Балынец уонна Айаал Сивцев дойду сүүмэрдэммит хамаандатыттан күрэхтэстилэр. Владимир Балынец эчэйии ылан туораата. Айаал Сивцев боруонса мэтээлгэ тигистэ. Пауэрлифтердары аан дойду чемпионатыгар тренер Петр Давыдов салайан илдьэ сырытта.

 

Хаҥалас ыччата Евгений Самсонов стритлифтиҥҥэ Москваҕа, Казахстан Уральскай куоратыгар уонна Турция Стамбулугар онлайн форматынан буолан ааспыт Европа чемпионатыгар кыттан, икки кыһыл көмүс мэтээли ылары ситистэ.

 

Мииринэй ыччата, саха тустууга оскуолатын көҥүл тустууга маастара Андрей Аронов Москваҕа буолан ааспыт кумахха тустууга Арассыыйа 1-кы чемпионатын кыайыылааҕа буолары ситистэ. 90 кг үөһэ ыйааһыннаахтарга Бурятия күүстээх маастардарын Цыбик Максаровы уонна Батор Цыреновы хотуталаата. Андрей Аронов олимпиец Айаал Лазарев спарринг-партнера, Киргизия чөмпүйүөнэ, Арассыыйа устудьуоннарын чөмпүйүөнэ, “Локомотив” спортобщество чөмпүйүөнэ, аграрнай университеттар Сайыҥҥы Универсиадаларын кыайыылааҕа, Красноярскайга “Сайтиев” уонна Калининградка “Шумилин” турнирдарын үрүҥ көмүс призера.

Намҥа сахалыы атах оонньуутун Федерациятын Кубогар күрэхтэстилэр. Өрөспүүбүлүкэ күүстээх маастардара түмсэн сэттэ туоска илин-кэлин түһүстүлэр. Күүтүллүбүтүн курдук, эр дьоҥҥо Манчаары оонньууларын абсолютнай чөмпүйүөнэ, “Лада” массыынанан наҕараадаламмыт Горнай маастара Кай Адамов бу да сырыыга туйгун туругар сылдьарын көрдөрөн, кылыыга, ыстаҥаҕа, куобахха үһүөннэригэр бастаталаан, Кубок хаһаайынынан буолла. Намтан Владислав Попов иккис, Бүлүүттэн Айаал Иванов үһүс бириистээх миэстэлэргэ тигистилэр. Дьахталларга эмиэ Манчаары оонньууларын муҥутуур кыайыылааҕа, “Лада” массыына хаһаайката Хаҥаластан Виктория Олесова кыахтаахтык бастаата. Уус Алдан маастар кыргыттара Евгения Адамова, Сайыына Салышева иккис-үһүс миэстэлэргэ тигистилэр. Кыра саастаах кыргыттарга Уус Алдантан Диана Федорова, уолаттарга Өлүөхүмэттэн Михаил Колпачков, улахан саастаах уолаттарга Данил Андросов бастаатылар. Чурапчыга тренердиир Иван Иванович Чиркоев эрчийэр уолаттара Данил Андросов уонна Эдуард Петров маастар нуорматын толордулар. Бастыҥнар аны сайын Владивостокка буолар норуоттар икки ардыларынаҕа “Азия оҕолоро” НСО кыттар хамаандаҕа киирэргэ маҥнайгы сүүмэрдээһин түһүмэҕин аастылар.

 

Рязань куоракка Арассыыйа Геройа полярник-айанньыт Михаил Малахов бириистэригэр оҕунан ытыыга түмүктэммит 13-с Бүтүн Арассыыйатааҕы күрэхтэһиилэргэ тренер Валентина Соркомова бэлэмнээбит Горнай улууһун ыччата Петр Дьячковскай бастакы миэстэни ылла. Москва уобалаһын хамаандатыттан кыттыбыт тренер Михаил Алексеевка эрчиллибит Хаҥалас ыччата Владислав Васильев эмиэ бастаата.

 

Өлүөхүмэҕэ “Чароит” спорткомплекска волейболистар Саха АССР үтүөлээх тренерэ, РСФСР үөрэҕириитин туйгуна, хайыһар спордугар ССРС маастарыгар кандидат, өрөспүүбүлүкэ хас да төгүллээх чөмпүйүөнэ, хас да көлүөнэ хайыһардьыттары ииппит Алексей Петрович Мордовской 70 сааһын туолуутун үөрүүлээх быһыыга-майгыга бэлиэтээтилэр. А.Н. Платонов аатынан Өлүөхүмэтээҕи оҕо спортоскуолатын дириэктэрэ Сергей Щебляков, үөрэх профсойууһун бэрэссэдээтэлэ, Өлүөхүмэ куоратын бэрэссэдээтэлин солбуйааччы Николай Котенко, оройуон физическэй култуураҕа уонна спорка управлениетын начаалынньыга Гаврил Сивцев уо.д.а. эҕэрдэлээтилэр. Юбиляр Алексей Мордовской чиэһигэр мини-футболга ыытыллыбыт күрэхтэһиигэ эр дьоҥҥо “Техникум”, “Легион-1”, “Легион-2” хамаандалара, дьахталларга “Магнит”, “Өлүөхүмэ бөһүөлэгин”, “Куорат сүүмэрдэммит” хамаандалара бастакы уонна бириистээх миэстэлэргэ тигистилэр. “Бастыҥ оонньооччуларынан” Алексей Габышев уонна Айталыына Степанова ааттаннылар.

Сонуннар

Ордук ааҕаллар

Дьоҕур-талаан арыллыыта
Спорт | 26.01.2023 | 18:00
Дьоҕур-талаан арыллыыта
Дьиҥинэн, Орто дойдуга кэлбит киһи барыта туохха эрэ дьоҕурдаах, талааннаах. Дьэ, ол арыллара, туттуллара дэбигис кыаллыбат. Ону үрдүк үөһээ айыыларбыт бэйэлэрэ быһааран эрдэхтэрэ. Биллэн турар, улаханнык сыраластахха, күнү-дьылы бараатахха, сүрэхтээх-бэлэстээх, туруу үлэһит, айылҕаттан айдарыылаах буоллахха эрэ дьоҕур, талаан кэлиэн сөп. Дьөгүөр Картузов, дьэ, кырдьык, айылҕаттан хатаҕаламмыт киһи. Тыа киһитин сиэринэн...
Сардаана Токоемова:  «Иистэн дуоһуйууну ылабын...»
Дьон | 28.01.2023 | 16:00
Сардаана Токоемова: «Иистэн дуоһуйууну ылабын...»
Иис сахаларга урут-уруккуттан хааммытыгар баар. Билигин биһиги ортобутугар талааннаах иистэнньэҥнэр, норуот маастардара аҕыйаҕа суохтар. Кустуктуу субуллар оһуор быысапкалары, сахалыы тыынынан илгийэр кылтан, сиэлтэн оҥоһуктары, туостан көбүөрдэри, сэлээппэлэри, халадаай былаачыйалары, оноолоох соннору, хаһыаччыктары о.д.а. саха дьахталлара ис сүрэхтэриттэн тигэллэр. Бу тигиилэргэ төһөлөөх дууһа сылааһа ууруллубута буолуой диэн киһи сөҕө эрэ саныыр....
«Прометей» оскуолатыгар сахалыы иитиини туруорсар төрөппүт кэккэтэ кэҥиир
Куорат олоҕо | 01.02.2023 | 17:00
«Прометей» оскуолатыгар сахалыы иитиини туруорсар төрөппүт кэккэтэ кэҥиир
Дьокуускай куорат историятыгар аан бастаан 990 миэстэлээх улахан оскуола аны күһүн үлэҕэ киириэхтээх.  990 миэстэ диэн бырайыактаммытынан уйунар кыаҕа буоларын өйдүөххэ наада. Киин куораппытыгар миэстэ тиийбэт кыһалҕата баарын тухары оскуолаларбыт 2-3 төгүл ноҕоруускалаах, иккилии симиэнэнэн үлэлии олоруохтара турдаҕа. Онон бу саҥа оскуолаҕа балтараа тыһыынчаҕа тиийэ оҕо үөрэнэрэ буолуо диэн барыллаан...
Көмө мүнүүтэ да тохтообот
Дьон | 03.02.2023 | 12:00
Көмө мүнүүтэ да тохтообот
Аҕа дойду Улуу сэриитин кэмигэр Саха сирин дьоно-сэргэтэ төһө да тыһыынчанан килэмиэтиринэн ыраах олордоллор, өйдөрө-санаалара Кыайыы эрэ туһугар сытара. Биир дойдулаахтарбыт харчынан, облигациянан, үрүҥ көмүһүнэн, кыһыл көмүһүнэн, балыгынан, күндү түүлээҕинэн о.д.а. көмөнү хара көлөһүннэрин тоҕон туран фроҥҥа ыыппыттара. Ийэлэрбит, эбэлэрбит ыарахан үлэлэрин быыһыгар төһөлөөх кээнчэни, үтүлүгү тигэн ыыппыттарай! Дэлэҕэ сэрии...