Спорт сонуннара

Көрөөччүтэ суох Паралимпиада

Токиотааҕы сайыҥҥы  Паралимпийскай оонньуулары тэрийээччилэр  күрэхтэһиилэри көрөөччүлэрэ суох ыытарга быһаарбыттара. Ону ырытыыга Япония бырабыыталыстыбатын чилиэннэрэ, Токио администрацията, аан дойдутааҕы паралимпийскай оонньуулары тэрийэр кэмитиэт кытыннылар.
Эрдэ этиллибитинэн,  киин Сидзуока префектуратыгар уонна Токиоҕа ыаллыы  Тиба уонна Сайтама стадионнарыгар толорута суох ахсааннаах дьонноох ыытыллыахтаахтара. Ол эрээри пандемия кутталыттан тохтотуллубуттара. 
Атырдьах ыйын 13 күнүттэн Японияҕа ыарыынан сутуллуу муҥутуур ахсааннаммыта — 20 293. Ити күн Токиоҕа көрдөрүү  антирекорда саҥардыллыбыта — 5 773 түгэн.

Дьокуускайга эр дьон кумахха волейболлуохтара

Дьокуускайга аһаҕас кумахха волейбол турнира ыытыллыа. Пляж волейбола — дьон биир сөбүлүүр көрүҥэ.  Кумахха волейбол  түргэн хамсаныыны уонна имигэс буолууну, тулууру эрэйэр.  
“Биир ньыгыл Арассыыйа” “Эдэр Гвардията” «Олимп» ХИФУ устудьуоннарын профсойууһун спорка хамыыһыйатын кытта холбоһон кумахха волейбол эр дьон хамаандаларын ортотугар турнирга сайаапкалары хомуйар:
— Кыттааччылар  16 саастарыттан киирэллэр. Хамаанда састааба: икки киһи (нүөмэрдээх биир формалаахтар);
— Эмчиттэртэн көҥүллээх буолуохтаахтар;
— Кыайыылаахтар уонна призердар мэтээллэринэн уонна грамоталарынан наҕараадаланаллар. Кыайбыт хамаандаҕа кубок туттарыллар.
Турнир атырдьах ыйын 21 уонна 22 күннэригэр 10 чаастан 202-с түөлбэ сөтүөлүүр сиригэр ыытыллар.

Саха охчуттара Арассыыйа чемпионатыгар кытталлар

Саха сирин 14 спортсмена оҕунан ытыыга Арассыыйа чемпионатыгар мэтээл иһин киирсиэхтэрэ. Күрэхтэһии атырдьах ыйын 16 күнүттэн Улан-Удэ киин стадионыгар ыытыллар. Күрэхтэһиигэ дойду  24 регионуттан  211 спортсмен кыттар.  Кинилэр истэригэр Олимпийскай оонньуулар  кыттыылаахтара уонна призердара бааллар; Токио Олимпиадатын үрүҥ көмүс призера  Елена Осипова (Ростов уобалаһа), Токиоҕа хамаанданан зачекка үрүҥ көмүс призера Светлана Гомбоева, Пекин Олимпиадатын кыттыылааҕа Наталья Эрдыниева, Рио-де-Жанейроҕа үрүҥ көмүс мэтээллээх  Инна Степанова. Ону таһынан түөрт Олимпиада кыттыылааҕа Бальжинима Цыремпилов уонна Забайкальскай кыраайтан Пекин боруонса призера Баир Баденов киирсэллэр.
Итинник үрдүк таһымнаах күрэххэ саха далла мэндэйээччилэрэ үгэс быһыытынан илин-кэлин былдьаһаллар. Охчуттар делегацияларын салайааччы  Михаил Алексеев, итиннэ  биһиги 14 спортсмеммыт киирдэ.
Чемпионнар уонна призердар атырдьах ыйын 19 күнүгэр биллиэхтэрэ.

Эрэлбит – кыргыттарбытыгар

Токиоҕа Паралимпийскай оонньууларга Степанида Артахинова, Анастасия Диодорова уонна Алена Дмитриева киирсиэхтэрэ. Кинилэр түмүктүүр сбордарын бара сылдьаллар. 
Анастасия Диодорова  Токиоҕа атырдьах ыйын 19 күнүгэр, оттон Степанида Артахинова уонна Алена Дмитриева  атырдьах ыйын 20 күнүгэр тиийиэхтэрэ.
2016 сылга өрөспүүбүлүкэҕэ спортсменнары бэлэмниир олимпийскай бырагыраама  тохтотуллубута, ол эрээри Ил Дархан Айсен Николаев быһаарыытынан сөхсүтүллүбүтэ.
Саха сирин олохтоохторо кыргыттарга эрэнэллэр, үрдүк кыайыылары кэтэһэллэр!

Хабиб миллиард аҥаардаах рекламаҕа илии баттаста

Охсуһуу муҥутуур чемпионатын урукку чемпиона  (UFC) Хабиб Нурмагомедов 7$ суумалаах  (миллиард аҥаара солкубай) реклама хантыраагар илии баттаһыаҕа  диэн  Instagram суруйар.
Хабиб  күүс биэрэр утаҕы рекламалыаҕа.
Американец Джастин Гэтжины Абу-Дабига кыайан баран   Нурмагомедов тохтуурун туһунан биллэрбитэ. Промоушен баһылыга төннөргө этэ сатаабытын, байыас бүтэһиктээхтик «биэнсийэҕэ барбытын» эппитэ.
Нурмагомедов 29 кыайыылаах, биирдэ да кыайтарбатаҕа. UFC–ка охсуһуутун 2012 сыллаахтан саҕалаабыта.  Промоушеҥҥа рекорда — 13-0.
UFC чэпчэки ыйааһыҥҥа урукку чемпион тренерэ Хавьер Мендес харчы Нурмагомедовка үтүөнэн сабыдыаллаабыта диэбитэ.  

Кыһыл көмүс мэтээл – 4 мөл. солкуобай

Токиоттан кыһыл көмүс мэтээли аҕалбыт паралимпиецтар 4 мөл. солкуобайы ылыахтара. Үрүҥ көмүс мэтээллээхтэр  2,5 мөл., боруонсалаахтар — 1,7 мөл. солкуобайынан наҕараадаланыахтара. Ити туһунан Арассыыйа Паралимпийскай кэмитиэтин  бэрэсидьиэнин эбээһинэһин толорооччу  Павел Рожков билиһиннэрдэ.
Токио Паралимпийскай оонньуулара атырдьах ыйын 24 күнүттэн балаҕан ыйын 5-гэр диэри ыытыллыахтара. Арассыыйаттан 432 киһи,  ол иһигэр 242 спортсмен кыттыахтара.  Биһиги паралимпиецтарбыт 19 спорт көрүҥэр күөн көрсүөхтэрэ.

Токиотааҕы Олимпиада кыттыылааҕа үрүҥ көмүс мэтээлин аукциоҥҥа туруорда

Польша үҥүү быраҕааччыта  Мария Андрейчик  бэйэтин  2020 сыллааҕы Олимпийскай мэтээлин  оҕону эмтэтэргэ харчы хомуйууга анаата.
Instagram страницатыгар спортсменка аҕыс саастаах Милошка сүрэҕин эпэрээссийэлэнэригэр 100-тэн тахса тыһыынча $ хомуйбуттарын кэпсээбитэ. Билигин уол АХШ-гар барарга бэлэм. 
«Ааспыт нэдиэлэҕэ аукциоҥҥа туруорбут мэтээлим дьон биэрбит харчыларын кытта холбоон мөлүйүөн аҥаара буолла», — диэн иһитиннэрдэ 25 саастаах Андрейчик.
Аукцион кыайыылааҕынан Польша аһы атыылыыр ситимнэрэ буолбута.  Хампаанньа бэрэстэбиитэллэрэ 2020 сыллаах Олимпиада мэтээлэ чэпчэки атлеткаҕа бэйэтигэр хаалбытын туһунан кэпсээтилэр. 
Оттон ити иннинэ Белоруссия чэпчэки атлетикаҕа 2019 сыллаахха Европейскай оонньууларга Кристина Тимановская ылбыт үрүҥ көмүһэ eBay аукциоҥҥа туруоруллубута. Бастакы сыаната  365 тыһ. солкуобай этэ. Күн аҥаарын иһигэр сыаната түөрт төгүл үрдээбитэ. 

Наҕараада дьоруойун булла

Биһиги өрөспүүбүлүкэбитгэр спорка атын дойду исписэлиистэрэ  кэлэн үлэлииллэрэ сэдэх. Покровскай куорат спортивнай оскуолатыгар Монголияттан Шагдар Гансух үөрэппитэ. Кинини  Монголия Норуодунай өрөспүүбүлүкэтин 100 уонна ити дойдуга дзюдо сайдыытын  сылларынан эҕэрдэлээн туран, Монголия ДОСААФ-ын Арассыыйаҕа официальнай бэрэстэбиитэлэ  национальнай спорт сайдыытыгар уонна РФ итиэннэ СӨ сыһыаннаһыыларыгар өҥөтүн иһин аан дойду кылаастаах маастары  уордьанынан наҕараадалаата.  Ис сүрэхтэн эҕэрдэлиибит уонна көмөҥ иһин махтанабыт.

Ньурба дзюдоистката Европаҕа кыттыаҕа

Прибалтика өрөспүүбүлүкэтэ 18 саастарыгар диэри спортсменнары чемпионакка түмүөҕэ. 
Арассыыйа хамаандатыгар Саха сирин кыыһа Полина Иудина киирдэ. Кини тренерэ Дамдиндорж Гомбодорж ити турнирга 70 кг ыйааһыҥҥа кыттыаҕа. Ньурба кыыһа чэппиэргэ кыттыытын саҕалыаҕа.  Полина атырдьах ыйын 19-гар татамига тахсыаҕа. Бастакы  эргииргэ кинини утары немка E. Будденкотте тахсыаҕа. Кыайбыт спортсменка Польшаттан А. Ковалевсканы утары киирсиэҕэ.