Спорт сонуна

Дьокуускайдар Бороҕоҥҥо барар буоллулар

Саха Өрөспүүбүүкэтин волейболга 1-кы лигаҕа чемпионата икки сиринэн ыытыллан түмүктэннэ. Алта иһигэр киирбит хамаандалар Бороҕоҥҥо буолар Саха сирин норуоттарын VIII-с Спортинай оонньууларыгар сүүмэрдэнэллэр.

Чурапчыга Александр Федотов аатынан элбэх функциялаах спортивнай комплекс саалатыгар эр дьон аҕыс хамаандалара күрэхтэстилэр. Чемпионат үөрүүлээх арыллыытыгар Саха Өрөспүүбүлүкэтин физическэй культураҕа уонна спорка миниистирэ Леонид Спиридонов, Чурапчы улууһун баһылыга Степан Саргыдаев, Ил Түмэн дьокутаата Михаил Гуляев, Саха Өрөспүүбүлүкэтин волейболга федерациятын толорооччу дириэктэрэ Яков Сивцев, күрэхтэһии кылаабынай судьуйата, РФ үрдүкү лигатын 1-кы категориялаах судьуйата Анатолий Чемерзанскай кыттыыны ыллылар, күрэхтэһии кыттыылаахтарын эҕэрдэлээтилэр.

Үөрүүлээх түгэҥҥэ урукку сылларга Чурапчы улууһун чиэһин элбэхтик көмүскээбит волейбол бэтэрээннэрэ Виталий Неустроев, Дмитрий Яковлев, Герасим Платонов, Петр Гуляев, Аркадий Пермяков, Вячеслав Попов, Василий Филиппов, Иван Флегонтов, Виктор Дьяконов, Иван Посельскай, Владислав Кривошапкин, Жанна Васильева, Клара Макарова, Софья Сорокоумова, Христина Попова спорт министиэристибэтин, улуус дьаһалтатын, волейбол бэдэрээссийэтин махтал суруктарын, сыаналаах бэлэхтэри туттулар.

Үс-түөрт күннээх сытыы киирсиилэр түмүктэринэн Дьокуускай хамаандата бастаата, Нам - иккис, Ленскэй үһүс бириистээх миэстэҕэ тигистилэр. Өлүөхүмэ - төрдүс, Чурапчы -  бэһис, Амма - алтыс, Горнай - сэттис, Университет ахсыс миэстэлэннилэр.

Намҥа түмүктэммит дьахталлар волейболга чемпионаттарыгар М.К. Аммосов аатынан ХИФУ хамаандата бастаата, Уус Алдан – иккис, Нам – үһүс, Дьокуускай – төрдүс, Амма – бэһис, Өлүөхүмэ – алтыс, Мииринэй – сэттис, Чурапчы ахсыс миэстэлэри ылаттаатылар.

Көбүөргэ – бөҕөстөр

Владивостокка буолан ааспыт 24-гэр диэри саастаах ыччаттарга классическай тустууга Уһук Илин чемпионатыгар Сахабыт сириттэн 55 кг Алексей Пинигин, 60 кг Родион Степанов, 72 кг Сергей Павлов чөмпүйүөн үрдүк аатын сүктүлэр. Владислав Павлов – үрүҥ көмүс, Федор Устинов боруонса мэтээллэри ылаттаатылар.

Манна даҕатан эттэххэ Н.Н. Тарскай кэриэһигэр 16-17 саастаах уолаттарга көҥүл тустууга өрөспүүбүлүкэҕэ биирдиилээн уонна хамаанданан бастыыр иһин күрэхтэһиигэ 16 улуустан 200 тустуук уол Дьокуускайга ХИФУ тустууга саалатын көбүөрүгэр күөн көрүстэ.

110 кг үөһээ ыйааһыннаахтарга аатырбыт бөҕөстөр ааттарын-суолларын салҕааччы Ньургун Чукров бастаабыта кэрэхсэбиллээх. Уус Алдан оҕолоро тэҥнээхтэрин булбатылар, Чурапчы – иккис, Дьокуускай үһүс бириистээх миэстэлэргэ тигистилэр. Сунтаар - төрдүс, Мэҥэ Хаҥалас - бэһис, Нам алтыс буоллулар. Кыайыылаахтартан сүүмэрдэммит Саха сирин хамаандата ыам ыйыгар Читаҕа Уһук Илин Арассыыйаҕа путевка былдьаһыылаах түһүлгэтигэр кыттыыны ылыахтара.

Бастыҥ боксер — Назар Андреев

Красноярскайга түмүктэммит үрдүк үөрэх кыһаларын устудьуоннарын Бүтүн Арассыыйатааҕы боксаҕа турнирыгар Саха сириттэн Назар Андреев 80 кг түөрт утарсааччытын хотуталаан бастаата уонна бу кэлэр күһүн Екатеринбурга буолар устудьуоннар Аан дойдутааҕы Кубоктарыгар кыттарга путевка ылла.

Атах оонньуута

Дьокуускайга “Юность” манежка атах оонньуутугар өрөспүүбүлүкэ кыһыҥҥы чемпионатыгар сэттэ туоска күрэхтэстилэр. Күүстээх маастардар бары кытыннылар.

Кылыыга Мэҥэ Хаҥаластан Игорь Скрябин 30 м 32 см түһэн бастаата, Горнайтан Кай Адамов – иккис, Мэҥэттэн Сергей Захаров үһүс буоллулар. Ыстаҥаҕа Горнайтан Кай Адамов 30 м 19 см көрдөрүүлээх бастаата, Игорь Скрябин – иккис, Тааттаттан Андрей Васильев үһүс миэстэлэннилэр. Куобахха Тааттаттан Андрей Васильев 26 м 92 см ойон бастаата, Кай Адамов – иккис, Дьааҥыттан Тимофей Слепцов үһүс буоллулар.

Үс көрүҥ түмүгүнэн кыайыылааҕынан Кай Адамов таҕыста, иккис үчүгэй көрдөрүүнү Игорь Скрябин ситистэ, үһүс миэстэни Андрей Васильев ылла.

Сахалыы волейбол

Агро-технологическай университет спортивнай саалатыгар Тихон Готовцев кэриэһигэр өрөспүүбүлүкэ волейболга турнира 27-с төгүлүн ыытылынна.

Турнир Саха Өрөспүүбүлүкэтин физическэй культураҕа уонна спорка үтүөлээх үлэһитэ, тренерэ, Уус Алдан улууһун уонна Баатаҕайын нэһилиэгин бочуоттаах олохтооҕо Прокопий Прокопьевич Готовцев үбүлүөйдээх 75 сааһыгар ананна. Бэтэрээннэр түөртүү дьахтартан уонна түөртүү эр киһиттэн турар хамаандалара  сахалыы волейболга оонньоотулар. Кылаабынай судьуйанан Семен Афанасьев, сэкирэтээринэн Зинаида Афанасьева, сүрүн тэрийээччилэринэн СахаВА бэрэсидьиэнэ Сергей Иванов, Иван Колодезников бэрэссэдээтэллээх Уус Алдан улууһун волейболга федерацията  үлэлээтилэр.

Икки күннээх хатыһыылаах киирсиилэр түмүктэринэн аммалар бастаатылар. Дьокуускайтан “Олимп” уонна Мэҥэ Хаҥаластан “Манчаары”  хамаандалара бириистээх иккис-үһүс миэстэлэргэ тигистилэр. Үс бастаабыт хамаанда Баатаҕай нэһилиэгэ (баһ. Михаил Белолюбскай) туруорбут биирдии куул соботунан наҕараадаланнылар. Итинтэн аллараа миэстэлэри Уус Алдантан “Тойон Мүрү”, “Урожай”, “Сахапечать”, “Сахава”  “Виктория” хамаандалара ылаттаатылар. “Бастыҥ оонньооччуларынан” Людмила Сентизова (Амма), Сергей Хоменок (“Олимп”), “Бастыҥ быһааччы” Татьяна Баринова (“Олимп”), Алексей Жирков (Амма), “Бастыҥ көмүскээччи” Анна Свинобоева (“Манчаары”), Михаил Прибылых (“Манчаары”), “Бастыҥ сибээстээччи” Сардаана Старостина (“Тойон Мүрү”), Евгений Жирков (“Тойон Мүрү”), Сардаана Старостина (“Тойон Мүрү”), “Тихон Готовцев турнирын саамай бэриниилээх волейболиһа” Антолий Похалуев (“Олимп”) Уус Алдантан төрүттээх СахаВа Бочуоттаах маастардара туруорбут анал бириистэринэн наҕараадаланнылар.

Куораппытыгар саахымат сайдар

Оҕо дыбарыаһыгар баар Анатолий Карпов аатынан саахымат оскуолатын тэрийиитинэн 14-гэр диэри саастаах оҕолор үс бөлөххө араарыллан, разряд нуорматын толоруулаах өрөспүүбүлүкэҕэ бастыыр иһин күрэхтэстилэр.

Мииринэйтэн, Нерюнгриттэн тиийэ кэлитэлээбиттэр. Ордук элбэх кыттааччы саҥа саҕалааччыларга баар. 15-тии мүнүүлээх сэттэ туур буолла. Оҕолор кыайарга улахан баҕалаахтарын көрдөрдүлэр. Бүтэһик оонньууларга диэри ким бастыыра биллибэт этэ. Хас да оҕо бастакы миэстэни былдьаһа сатаата. Хотторууттан хомойоннор харахтарын уута ыган тахсарын кистээбэтилэр. Разряд ылар иһин киирсиилэргэ 35 буолан оонньоотулар. Үгүс кыра саахыматчыт түргэнник кыайа охсорго дьулуста, инньэ гынан кыайа олорор балаһыанньаларын кыһыылаахтык төлө туттулар.

Куорат 2 №-дээх политехническэй оскуолатын 3-с кылааһын үөрэнээччитэ Арсен Константинов маҥнайгы утарсааччытын комбинациялаан,  ферзэтинэн атаакалаан, онтон тута слонун киллэрэн, 20-чэ сөкүүндэ иһинэн маат туруоран үөрдэ-көттө, “Кыайдым!” – диэн саала иһэ ньиргийиэр диэри дорҕоонноохтук иһитиннэрдэ. Онтон үрдүкү кылаастар дуоспуруннаахтык, чуумпутук оонньоотулар.

Саҥа саҕалааччыларга оҕо уһуйаанын иитиллээччитэ, саахымакка аналлаах “Комбинация” оскуолатыгар дьарыктанар Дьулуур Федоров бастаата, Костя Павлов, Артур Стручков иккис уонна үһүс миэстэлэннилэр. Орто саастаахтарга Валерия Слепцова, Эрчим Мегежекскэй, Алеша Колокольцев; разрядтаахтар үһүс бөлөхтөрүгэр Саша Санников, Денис Чомчоев, Сарыал Васильев кыайыылары ситиһэн, өйдөбүнньүк мэтээллэринэн, дипломнарынан, сувенирдарынан наҕараадаланнылар.

Саахымат спордун көрүҥэ сайдан, тэнийэн иһэрэ көһүннэ. “Оскуолаларга саахыматы үөрэтэллэр, чааһынай оскуолалара кылаастар арыллан үлэлииллэр. Талааннаах оҕолор уруккаттан бааллар. Үчүгэй тренердэр тиийбэттэр. Бу кэнники өрөспүүбүлүкэ күүстээх саахыматчыттара Руслан Пахомов, Роман Ганжуров, Ньургун Винокуров курдук эдэр спорт маастардара саахыматы өрө таһааран эрэллэр”,- диэн Оҕо дыбарыаһын саахыматка тренерэ, турнир сүрүн судьуйата, өрөспүүбүлүкэ чөмпүйүөнэ, маастарга кандидат Владимир Михайлович Макаров санаатын үллэһиннэ.