«Сосновый бор» лааҕыр үлэтин саҕалаата

Саҥа дьыллааҕы симиэнэ анал эпэрээссийэ кыттыылаахтарын дьиэ кэргэттэриттэн 120 оҕоҕо оросчуоттаммыт. Симиэнэ Самуил Маршак «Двенадцать месяцев» остуоруйатыгар ананар.

«Ахсынньы 14 күнүгэр «Сир уустара» өрөспүүбүлүкэтээҕи Үөрэтэр-чэбдигирдэр кииҥҥэ эмиэ анал эпэрээссийэ кыттыылаахтарын дьиэ кэргэттэрин оҕолоругар анаан саҥа дьыллааҕы симиэнэ саҕаланар. Сынньалаҥынан уонна чэбдигирдиинэн 26 оҕо хабыллыаҕа», – диэн иһитиннэрдэ СӨ Үөрэҕириитин миниистирин бастакы солбуйааччы Алевтина Аргунова.

«Сир уустара» кииҥҥэ симиэнэ ахсынньы 14-24 күннэригэр үлэлиэҕэ.

Үөрэҕирии министиэристибэтин дааннайдарынан, билиҥҥи туругунан, анал эпэрээссийэ кыттыылаахтарын оҕолоругар  2870 тахса көмө миэрэтэ оҥоһуллубут, ол иһигэр оҕо уһуйаанын иһин төлөбүртэн 842 босхоломмут, 984 байыаннай сулууспалаахтар оҕолоро – 5-11 кылаас үөрэнээччилэрэ босхо итии аһылыгынан, оттон 958 – сынньалаҥынан уонна чэбдигирдиинэн хааччылыннылар.