30.03.2022 | 13:00

Сокуоннай саастарын ситэ иликтэр ортолоругар буруйу оҥоруу аҕыйаата

Сокуоннай саастарын ситэ иликтэр ортолоругар буруйу оҥоруу аҕыйаата
Ааптар: Киин Куорат

Киин куоракка сокуоннай саастарын ситэ иликтэр ортолоругар буруйу оҥоруу ахсаана наматаабыта көстөр. Итини сэргэ оҕо лааҕырдарыгар путевка сыаната үрдээбит, ол эрэн кинилэргэ субсидия көрүллэр уонна  «кешбэк» бырагыраама салҕанар. Бу туһунан Дьокуускай куораттааҕы Дуума пресс-сулууспата иһитиннэрдэ. 
Кулун тутар 23 күнүгэр ити уонна атын боппуруостары  Дьокуускай куораттааҕы Дуума социальнай бэлиитикэтигэр сис хамыыһыйатыгар дьүүллэстилэр. Хамыыһыйа үөрэҕирии тэрилтэлэрин хапытаалынай өрөммүөннэригэр сыһыаннаах үс боппуруоһу көрдө, ону кытта Олохтоох дьаһалта сокуоннай саастарын ситэ иликтэр дьыалаларыгар Хамыыһыйатын уонна эппиэкэҕэ салаатын 2021 сыллааҕы үлэлэрин түмүгүн уонна 2022 сыллааҕы былааннарын иһиттэ. 
Үөрэҕирии Управлениетын начаалынньыгын солбуйааччы Мирослав Афанасьев иһитиннэрбитинэн, быйыл үөрэҕирии 11 эбийиэгин хапытаалынай өрөмүөнүгэр федеральнай бүддьүөттэн субсидия көрүллүбүт. Испииһэккэ 10-с, 20-с, 21-с, 23-с, 27-с, 31-с, 33-с, 36-с №-дээх орто оскуолалар, Марха 1-гы №-дээх оскуолата, ЯГНГ, Саха-политехническай лицей киирэ сылдьаллар.  Хапытаалынай өрөмүөн уопсай суумата 809,1 мөлүйүөн солкуобай, урукку өттүгэр маннык улахан суума бэриллэ илигэ бэлиэтэннэ. 
Үөрэҕирии тэрилтэлэрин хапытаалынай өрөмүөннэрин ороскуота сарбыллыбат. Итини таһынан, оскуолалар саҥа тэрилинэн хааччыллыахтара. Өрөмүөн үлэтин үөрэх дьыла саҕаланарыгар түмүктүүр курдук ыам  ыйыттан саҕалыыллар. 
Хамыыһыйа бэрэссэдээтэлэ Айаан Васильев ыйытыгар куорат баһылыгын бастакы солбуйааччы Алексей Корнилов хоруйдаан, тутуу матырыйаалларыгар сыана үрдээһиниттэн хос суоттааһын, сыана экспертизатын кэнниттэн хантыраактар уларыйыахтаахтарын эттэ. 
2023 сылга 14 үөрэх тэрилтэтэ хапытаалынай өрөмүөнү ааһара былааннанар. Итини таһынан, оҕо лааҕырдарыгар аһылык сыанатын үрдээһинэ быһаарыллар. Ас-үөл сыанатын, хамнас уонна хамнас алын кээмэйин улаатыылара путевка сыанатыгар быһаччы сабыдыаллыыллар. Ол эрэн, төрөппүттэр хармааннарыгар охсуу суох буолуоҕа, тоҕо диэтэр путевкаларга субсидия көрүллэр уонна  «кешбэк» бырагыраама салҕанар. 
Олохтоох дьаһалта сокуоннай саастарын ситэ иликтэр дьыалаларыгар Хамыыһыйатын үлэтин хааччыйар Салаа начаалынньыга Наталья Андросова 2021 сыллааҕы үлэлэрин түмүгүн билиһиннэрдэ. Кини бэлиэтээбитинэн, куорат үрдүнэн сокуоннай саастарын ситэ иликтэр ортолоругар буруйу оҥоруу ахсаана наматаабыт, ол иһигэр ыарахан буруйу оҥорууга. Учуокка турар сокуону кэһээччи ахсаана аҕыйаабыт. 
Кыһалҕалаах түгэннэртэн Наталья Васильевна социальнай өттүнэн кутталлаах балаһыаннаҕа сылдьар ыал ахсаана элбээбитин ыйда. РФ УК 132 ыстатыйатынан тахсар буруй элбэҕэ этилиннэ. Холуобунай дьыаланы үксүн кииринньэҥ аҕалар оҥороллоро бэлиэтэннэ. 
Наталья Андросова эппитинэн, ити кыһалҕаны быһаарарга биэдэмистибэлэр икки ардыларынааҕы былаан оҥоһуллубут уонна «педофилия» иһин накаастабылы күүһүрдэргэ этии киирбит. Итини таһынан, быйыл социальнай өттүнэн кутталлаах балаһыаннаҕа сылдьар ыаллары кытта реабилитациялыыр үлэ ыытыллыахтаах. 
Олохтоох дьаһалта эппиэкэҕэ уонна попечительствоҕа Салаатын начаалынньыга Оксана Максимова 2021 сыллааҕы үлэлэрин билиһиннэрдэ. Куорат уокуругун территориятыгар 91660 оҕо олорор. Тулаайах уонна төрөппүт көрүүтэ-истиитэ суох хаалбыт 18 сааһыгар диэри оҕо – 1003, итинтэн: эппиэкэҕэ, попечительствоҕа уонна ыалга иитиллэ сылдьар оҕо ахсаана – 974, статустаах уонна төлөбүрдээх – 855, тулаайах уонна төрөппүт көрүүтэ-истиитэ суох хаалбыт анал тэрилтэлэргэ олорор оҕо ахсаана – 119. 106 оҕо 28 дьиэ кэргэҥҥэ иитийэххэ сылдьар. 
Кыһалҕалаах боппуруостарынан Оксана Алексеевна үлэһит штата тиийбэтин, тырааныспардара суоҕун бэлиэтээтэ. Куорат нэһилиэнньэтэ сылын ахсын улаатан иһэринэн сибээстээн үлэһит штатын элбэтиини сокуоннай саастарын ситэ иликтэр дьыалаларыгар Хамыыһыйа эмиэ туруорсар. Ити боппуруостары быһаарарга үрдүкү уорганнарга этии киллэрэр быһаарыы ылылынна.

Сонуннар

Ордук ааҕаллар

Үлэҕэ ыыппытым, состоруулаах кэллэ
Сынньалаңңа | 22.09.2022 | 18:00
Үлэҕэ ыыппытым, состоруулаах кэллэ
Биһиги ыал буолан олорбуппут 20-тэн тахса сыл буолла. Кэргэммин хас хамсаныытын, тыынарын, атаҕын тыаһын, оннооҕор ааны арыйан киирэриттэн настарыанньата уларыйбытын олох ончу курдаттыы билэбин. Ол курдук чугастыыбыт, ол курдук бэйэ-бэйэбитин билсэн, биир сыалай буолбуппут ыраатта. Оннооҕор биир түүлү түһээн турааччыбыт, киэһээҥҥи аһылыкка тугу астыахтаахпытын, тугу сиэхпитин баҕарарбытын тэҥинэн этэн кэбиһэн...
Үлэни, дьиэ кэргэни өрө-тутан – үйэ аҥаара бииргэ
Дьон | 22.09.2022 | 10:00
Үлэни, дьиэ кэргэни өрө-тутан – үйэ аҥаара бииргэ
Быйыл балаҕан ыйыгар Дьокуускайга Саха АССР 100 уонна киин куорат төрүттэммитэ 390 сылларыгар анаммыт «Трудовые династии города Якутска» кинигэ сүрэхтэммитэ. Кинигэни Саха сирин бэчээтин туйгуна Юрий Троев таһаарда, ааптар-хомуйааччы – Матрена Кондратьева.
Үтүө үөрүйэх уонна практикаҕа таба туһаныы
Сонуннар | 22.09.2022 | 11:22
Үтүө үөрүйэх уонна практикаҕа таба туһаныы
Дьокуускай куорат спортивнай үҥкүүгэ тренердэрэ анал үөрэхтээһини көхтөөхтүк ааһаллар уонна бэйэлэрин сатабылларын үрдэтэллэр. Балаҕан ыйыгар ыытыллыбыт үөрэх бу сылга номнуо иккиһин буолла. Тустаах тосхол 2021 сыллаахха бигэргэниэҕиттэн 5 маастар- кылаас ыытылынна.
Саныахха бу ааспыт сайыны
Сынньалаңңа | 23.09.2022 | 18:00
Саныахха бу ааспыт сайыны
Сайыммыт элэс гынан ааспытын өйдөөбөккө да хааллыбыт. Харах далыгар сылдьар дьоммут сынньалаҥнарын хайдах атаардылар? Ким тугу ситистэ, ханна сырытта? Ол туһунан биһиги “сулус” доҕотторбутуттан сурастыбыт.