Сир аһын хомуйуу болдьоҕо саҕаланан эрэр
Саха Өрөспүүбүлүкэтин Экологияҕа, айылҕаны туһаныыга уонна ойуур хаһаайыстыбатыгар министиэристибэтэ 2024 сылга сир аһын хомуйуу көҥүлүн болдьоҕун таһаарда.
Ол курдук, кэлэр нэдиэлэттэн, от ыйын 10 күнүттэн, Аммаҕа, Уус Алдаҥҥа – дьэдьэн, от ыйын 15 күнүттэн Таатта, Чурапчы, Уус Алдан улуустарыгар дьэдьэн, хаптаҕас хомуйар көҥүллэнэр. Сугуну от ыйын 20 күнүттэн хомуйуохха сөп.
Моонньоҕон уонна уулаах отон атырдьах ыйын ортотугар ситэр. Онон киин уонна Бүлүү бөлөх оройуоннарга уулаах отону атырдьах ыйын 25 күнүттэн, хоту улуустарга атырдьах ыйын бүтүүтэ хомуйар көҥүллэнэр.
Охтаны хоту улуустарга атырдьах ыйын бастакы дэкээдэтигэр хомуйуохха сөп.
Биэ эмиийэ Бүлүү бөлөх улуустарга от ыйын 16-22 күннэригэр хомуллар.
Хараһы Мииринэйгэ атырдьах ыйын саҥататтын, оттон Ленскэй, Нерюнгри оройуоннарыгар атырдьах ыйын ортотуттан хомуйар көҥүллэнэр.
Эриэхэни атырдьах ыйын 25, сорох оройуоннарга балаҕан ыйын 1 күнүттэн хомуйар көҥүллэнэр. Санатар буоллахха, эриэхэни ситэн сиргэ түспүтү эрэ хомуйуллар.
Тэллэйи хомуйууга хаарчахтааһын суох. Ол эрээри айылҕа харыстабылын үлэһиттэрэ тэллэйи быһан эбэтэр сирин алдьаппакка эрийэн ылары санаталлар.
Санатар буоллахха, ыйыллыбыт болдьоххо сир аһын хомуйуу биирдиилээн дьоҥҥо эрэ сыһыаннаах. Ойуур хаһаайыстыбатын сокуонунан, сир аһынан эргинэр сыаллаах хомуйарга ойуур учаастагын куортамныыр туһунан дуогабар түһэрсиллиэхтээх.
Айылҕа бэлэҕин сомсуҥ, ол эрээри хардатын ойуурга харыстабыллаахтык сыһыаннаһыҥ, ойуур баһаарын төрүөтэ буолбат туһуттан уотунан туттумаҥ!
Киин куорат олохтоохторугар анаан Дьокуускайга сүрүн сир аһын көҥүлүн болдьоҕун таһаарабыт:
Дьэдьэн – от ыйын 22 күнүттэн;
Хаптаҕас – от ыйын 27 күнүттэн;
Сугун – атырдьах ыйын 2 күнүттэн;
Моонньоҕон – атырдьах ыйын 12 күнүттэн;
Уулаах отон – атырдьах ыйын 23 күнүттэн.
Улуустарга биллэриллибит болдьохтору сиһилии таблицаҕа көрүҥ:
Сонуннар
Ордук ааҕаллар
