«Sinet Team Yakutsk Marathon» марафон ыытыллар

Олохтоох дьаһалта уонна СӨ Физическэй култуураҕа уонна маассабай спортка управлениетын өйөбүллэринэн бу сайын  «Sinet Team Yakutsk Marathon» марафон ыытыллар. Киэҥ хабааннаах сүүрүү Саха АССР төрүттэммитэ 100 сылыгар ананар. Бу туһунан Олохтоох дьаһалта пресс-сулууспата иһитиннэрдэ.
 «Sinet Team Yakutsk Marathon» Дьокуускайга 2016 сылтан ыытыллар. Бастакы марафон тэрийээччитинэн «Fitness Life» генеральнай дириэктэрэ Виктор Салтыков, оттон титульнай спонсорынан «Sinet Team» буолбуттара. 
Быһа холоон сүүрүү от ыйын 2 күнүттэн  3 күнэ буолар түүнүгэр былааннаммыт.
42,2 км сүүрүүнү сэргэ 21,1 км, 10,5 км уонна 5 км, ону кытта  500 м оҕолорго дистанциялар баар буолуохтара. Сүрүн дистанцияны сүүрүүгэ (42,2 км) кыттааччыга 6 чаас бэриллэр. 
Кыттыан баҕалаахтары регистрациялааһын 2022 сыл олунньу 1 күнүттэн www.ykt.run сайтка ыытыллар. Регистрацияланар усунуос улахан дьоҥҥо – 2000 солкуобай, 7-тэн 12 саастарыгар диэри оҕолорго – 500 солкуобай.