Шашлык-машлык

Дьэ эрэ, доҕоттор, күүтүүлээх-кэтэһиилээх күөх маайдарбыт үүннүлэр, ону кытта тута өйбүтүгэр туох түһэн кэлэрий? Биллэн турар, пикник, шашлык-машлык, айылҕа, түптэ унаар буруотун сыта-сымара уонна, биллэн турар, хас да күннээх өрөбүллэр.
Онтон, сынньана түспүппүт кэннэ, ыһыахтар, окко киирии, дьэдьэн-отон. Чэ, ити курдук бара турар, биирдэ өйдөөбүппүт саҥа дьылга бэлэмнэнэ сылдьар буолуохпут.

Томаттаах сибиинньэ этиттэн шашлык

2 кг сибиинньэ куҥ этэ;

2 луук;

1 тутум сибиэһэй күөх үүнээйи;

2 ост. нь. томат паастата;

1 ост. нь. бытархай паприка;

Бэйэ сөбүлүүрүнэн кыһыл сытыы биэрэс, кориандр, хара биэрэс.

Күөх үүнээйини бытархайдыы кырбыыбыт, луугу тиэрбэстии быһабыт. Эти 2 см хоһуоччуктуу кырбаан баран дириҥ миискэ түгэҕэр угабыт, күөх үүнээйибитин, томаты, специяларбытын кутабыт уонна эппитин сабар гына биир ыстакаан оргуйбут уунан бүрүйэбит. Булкуйабыт, туус куппаппыт, маринадпытын түүн устата хаалларабыт. Шашлыкпыт буһуон икки чаас иннинэ биирдэ туус кутабыт.

Сибиинньэ этиттэн түргэнник бэлэмнэниллэр шашлык

2 кг сибиинньэ куҥ этэ;

1 кг эриэппэ луук;

5 устуука лавр сэбирдэҕэ;

1 ч.нь. хара биэрэс, туус.

Эппитин кырбыыбыт, маринуйдуур иһиппитигэр угабыт, луугу мясорубкаҕа эрийтэрэн баран эппитигэр кутабыт, биэрэстиибит, лавр сэбирдэҕин, туус эбэн баран үчүгэйдик булкуйабыт.

Шампанскайы кытта сибиинньэ этэ

2,5 кг сибиинньэ этэ;

1 бытыылка сухой шампанскай;

5 эриэппэ луук;

Бэйэ сөбүлүүрүнэн араас тума, туус.

Эппитин кырбаан баран луугу тиэрбэстии быһабыт, лаахтаах иһиккэ угабыт. Туустаан-тумалаан баран, шампанскайбытын кутабыт, биир чаас устата маринуйдуубут.

Үрүҥ астан маринад

1 кг сыалаах сибиинньэ этэ;

5 өлүүскэ чеснок;

2 ыстакаан үүт;

Биирдии помидор, болгарскай биэрэс, луук, моркуоп;

4 ост. нь. саахар, хара биэрэс.

Үүтү миискэҕэ кутабыт, хара биэрэс, туус, саахар кутан баран 10-15 мүнүүтэ бытаан уокка оргутабыт, сойорун кэтэһэбит. Сибиинньэ этин бысталаан баран тууһунан уонна чесногунан сотобут, үүттэн оҥоһуллубут маринадпытыгар уган баран 4-5 чаас устата кэтэһэбит. Шампурга эппитин үөлэн, быыстарыгар биэрэһи, төгүрүк луугу, помидору, моркуобу анньабыт уонна шашлыкпытын кэмиттэн-кэмигэр үүттээх маринадпытын кута-кута буһарабыт.

Сибиинньэттэн сытыы амтаннаах шашлык

1 кг сибиинньэ этэ;

Бытарытыллыбыт 2 устуука лавр сэбирдэҕэ;

4 ост. нь. оливка арыыта;

4 ч. нь. паприка;

3 ч. нь. тмин;

Иккилии ч. нь. базилик уонна кориандр, ч. нь. аҥаара илдьиритиллибит имбирь;

Бэйэ сөбүлүүрүнэн корица, мускатнай эриэхэ, сытыы кыһыл биэрэс, хара биэрэс, туус.

Эппитин сууйан, куурдан баран кубиктыы кырбыыбыт. Паприканы, тмины, кориандры, имбиры, базилигы, лавры, корицаны, хара уонна кыһыл биэрэһи, оливка арыытын, мускаты, тууһу барытын булкуйабыт. Манна эппитин кутан баран булкуйабыт. Хаппахтаан баран 8-12 чаас устата тымныы сиргэ туруорабыт, булкуйа сылдьабыт. Шашлыгы биэриэх иннинэ лимон согунан ыһыахха сөп.

Шашлыкка барсар салааттар

Баклажаннаах салаат

Туох наадата: 

1 баклажан;

 1 болгарскай биэрэс;

2 помидор;

1 эриэппэ луук;

1 ост.нь. виннай уксус;

3 ост. нь. мас арыыта, тума.

Бэлэмнээһинэ: оҕуруот аһын барытын бөдөҥ куһуоччук гына кырбааҥ. Баклажаны буһарыҥ, болгарскай биэрэһи уонна луугу эрэһиэккэҕэ сымныар диэри буһарыҥ. Салааты мас арыытынан уксууһунан уонна туманан тупсарыҥ.

Греческэй салаат

Туох наадата: 

2 оҕурсу;

3 помидор;

 2 болгарскай биэрэс;

1 фиолетовай луук;

150 г фета;

1 бааҥка маслина;

 4 ост. нь. оливка арыыта;

1 ост. нь. орегано;

туус, хара биэрэс.

Бэлэмнээһинэ: бары оҕуруот аһын уонна фетаны бөдөҥ гына кырбастаа. Салааты булкуй, тумата кут, ореганоны таммалат уонна оливка арыытын кут.

Помидордаах, лууктаах салаат

Туох наадата: 

3 помидор;

 2 луук;

Ыстакаан аҥаара уу;

Ыстакаан 1/3 уксус:,

2 ост. нь. мас арыыта, тума.

Бэлэмнээһинэ: луугу тиэрбэстии кырбаа, итии уута кутан уксустаах ууга 10 мүнүүтэ маринуйдаа. Помидордары өлүүлүү кырбаталаа, луугу кытта булкуй уонна мас арыыта кут.

Пекинскэй хаппыысталаах салаат

Салааты бэйэ сөбүлүүрүнэн мас арыытынан, майонеһынан эбэтэр йогуртунан тумалыахха сөп.

Туох наадата: 

1 пекинскэй хаппыыста;

1 луук;

1 бааҥка кэнсиэрбэлэммит горох;

2 оҕурсу.

Бэлэмнээһинэ: оҕурсуну төгүрүктүү кырбаа, луугу – тиэрбэстии, хаппыыстаны синньигэс гына. Гороҕу эбэн баран булкуй.

Фасоллаах салаат

Туох наадата: 

1 бааҥка кэнсиэрбэлэммит фасоль;

2 оҕурсу;

1 луук;

1 дьаабылыка;

1 тутум күөх луук,

100 г сүөгэй;

 1 ч. нь. хартыыһа, тума.

Бэлэмнээһинэ: фасоль сууйуллар, луугу, дьаабылыканы уонна оҕурсуну кубиктыы кырбаа уонна күөх луугу кут. Салааты хартыыһалаах, араас тумалаах сүөгэйи эбэҥҥин булкуй.

Моркуоптаах уонна сүбүөкүлэлээх салаат

Туох наадата: 

300 г хаппыыста;

100 г сүбүөкүлэ;

100 г моркуоп;

100 г дьаабылыка;

1 өлүүскэ чеснок;

Күөх от, лимон сога, оливка арыыта.

Бэлэмнээһинэ: хаппыыстаны синньигэс гына кырбаа, сүбүөкүлэни түөркэлээ, моркуобу уонна дьаабылыканы соломолуу быс. Чесногу уонна күөх оту илдьирит, салааккар кутан булкуйан баран оливка арыытын кут.