«Севернай» дьоҕус оройуоҥҥа бастакы дьиэлэр гааска холбоннулар
Киин куорат «Севернай» дьоҕус оройуонун бастакы түөрт дьиэтэ ахсынньы 7 күнүгэр гаас ситимигэр холбоннулар. Эбийиэккэ «Сахатранснефтегаз» АУо тутар учаастагын биригээдэтэ үлэлээтэ. Социальнай гаастааһын бырагырааматын чэрчитинэн сир учаастактарыгар гаас ситимнэрин босхо чугаһаталлар. Бу туһунан «Сахатранснефтегаз» АУо пресс-сулууспата иһитиннэрдэ.
«Севернай» дьоҕус оройуонун гаастааһын 2019 сылга саҕаламмыт. Быйыл гаас ситимнэрэ «Сахатранснефтегаз» АУо-ҕа бэриллибиттэр. Бырагыраама чэрчитинэн ахсынньы ый бүтүөр диэри 20-чэ ситим дьиэлэр учаастактарын кыраныыссатыгар чугаһытыллыахтаах.
«Севернай» кыбаарталга социальнай гаастааһыҥҥа 55 сайаапка киирбит. Билиҥҥи туругунан босхо чугаһатыллар критерийгэ 14 дьиэ хапсарын уонна сыл бүтүөр диэри гаас киириэхтээҕин туһунан «Сахатранснефтегаз» АУо гааһы тарҕатар ситимнэрин Управлениетын начаалынньыгын солбуйааччы Моисей Ефимов иһитиннэрбит. Саха сирин олохтоохторо социальнай гаастааһын бырагырааматыгар көхтөөхтүк кытталлар, 2000 тахса сайаапка киирбит, ол иһигэр Дьокуускайга – 900-чэ сайаапка, 300-тэн тахса дуогабар түһэрсиллибит.
Социальнай гаастааһыҥҥа хапсарга усулуобуйа – бас билээччи аатыгар суруллубут тутуллан бүппүт дьиэ уонна сир учаастага, гааһы тарҕатар ситим баар буолуохтаахтар. Гаастааһын регионнааҕы операторын кытта дуогабар түһэрсэргэ бас билээччи учаастак иһигэр гаас ситимин бэлэмниир болдьоҕо ыйыллара ирдэнэр. Сайаапканы онлайн көрүҥүнэн SG.AOSTNG.RU саайтка биэриэххэ сөп.