Сэрии бэтэрээнэ Семен Колтовскойу 100 саастаах үбүлүөйүнэн эҕэрдэлээтилэр

Бэтэрээн олорор Кузьмин уулуссатыгар баар дьиэтин тиэргэнигэр «Тиэргэнинэн ыллыыбыт» кэнсиэр-аахсыйа тэрилиннэ.

Үбүлүөйдээҕи эҕэрдэлии СӨ ИДьМ миниистирин солбуйааччы Владимир Климов, Дьокуускай куораттааҕы нэһилиэнньэ социальнай харалтатыгар уонна үлэҕэ управлениетын салайааччыта Семен Матвеев, Гагарин уокуругун Управатын салайааччыта Евгений Сидоренко, Дьокуускай куораттааҕы Дуума Гагарин уокуругуттан дьокутаата Саргылана Васильева, 14129-с байыаннай чаас пуунун офицера Николай Глухарев, Дьокуускай куораттааҕы Бэтэрээннэр сэбиэттэрин бэрэссэдээтэлин солбуйааччы Клавдия Егорова, ИДьМ сотрудниктара,  Ю.А. Гагарин аатынан Култуура уонна аныгы искусство киинин уонна  Гагарин уокуругун Управатын үлэһиттэрэ, бэтэрээн ыаллара, киин куорат уопсастыбаннаһа уонна ыччата кэллилэр.

Дьокуускай куораттааҕы нэһилиэнньэ социальнай харалтатыгар уонна үлэҕэ управлениетын салайааччыта Семен Матвеев бэлиэтээбитинэн, киин куоракка 17 сэрии кыттыылааҕа олорор.

СӨ Ил Дархана Айсен Николаев аатыттан «Үйэ саас» бочуоттаах знагы Семен Колтовской сиэнэ Екатерина Белолюбская тутта. Үбүлүөйдээх бэтэрээҥҥэ 100 тыһыынча солкуобай суумалаах биир төгүллээх төлөбүр көрүлүннэ.

Олохтоох дьаһалта уонна куорат баһылыга Евгений Григорьев ааттарыттан бэтэрээни Гагарин уокуругун Управатын салайааччыта Евгений Сидоренко эҕэрдэлээтэ. Куорат баһылыгын аатыттан Семен Колтовскойга 50 тыһыынча солкуобай суумалаах сертификаты туттардылар.

Музыкальнай нүөмэрдэринэн Саха сирин Галина Кривошапко аатынан Судаарыстыбаннай филармониятын солиһа Дмитрий Никифоров-Келлер, Владимир Сердюк уонна полиция старшай лейтенана Анна Бегим эҕэрдэлээтилэр.

Семен Иванович Колтовской 1922 сыллаахха балаҕын ыйын 14 күнүгэр Бүлүү улууһун Кыргыдай нэһилиэгэр төрөөбүтэ. 1944 сыллаахха Кыһыл аармыйа кэккэтигэр ыҥырыллыбыта. Семен Иванович Аҕа дойду II-с степеннээх уордьанынан, «За боевые заслуги», «За победу над Германией», «За победу над Японией», «За безупречную службу» бойобуой мэтээллэринэн, «75 лет Победы» Дьокуускай куорат үбүлүөйдээх мэтээлинэн наҕараадаламмыта.