Сергей Сивцев күн тоҕо көстүбэтин быһаарда

Саха сирин экологияҕа, айылҕа баайын туһаныыга уонна ойуур хаһаайыстыбатыгар миниистирин солбуйааччыта Сергей Сивцев күн тоҕо көстүбэтин уонна буруо туһунан быһаарбыт. 
«Билигин Таатта уонна Уус-Алдан улуустарыгар хас да улахан ойуур баһаардара бааллар. Хотугулуу-илиҥҥи тыал ол  диэкиттэн хойуу буруону аҕалар. Кэбээйи, Бүлүү уонна Ньурба оройуоннарыгар билиҥҥи туругунан күүстээх буруо турар, ол иһин хараҥа, күн көстүбэт», - диир Сергей Сивцев.
Өрөспүүбүлүкэ кылаабынай лесничэйэ этэринэн, Кэбээйи улууһугар ураты болҕомто ууруллар. 
«Билиҥҥи туругунан Кэбээйи улууһун территориятыгар 9 ойуур баһаара баар, онтон 5 баһаара Ситтэ нэһилиэнньэлээх пуун сиригэр уонна биирдии баһаар Лүксүгүҥҥэ, Сангаарга, Кэбээйигэ уонна Кальвицаҕа. Баһаары умуруоруу уопсай иэнэ – 15864,3 га. Итиннэ 283 киһи уонна 26 тиэхиньикэ үлэлиир», - диэн бэлиэтиир Сергей Сивцев.
Дьокуускайдааҕы күнү-дьылы кэтээн көрөр Управление дааннайынан, киин куоракка нэдиэлэ устата син-биир буруолаах буолара күүтүллэр.