Сэргэх буол
Билиҥҥи үйэҕэ үгүс киһи сарсыардатын кофеттан саҕалыыр. Онто суох ситэри уһуктубаппыт, сүгүн үлэлээбэппит диир дьон баар. Дьиҥинэн, натуральнай, зерновой кофе күҥҥэ биир-икки чааскы доруобайаҕа туһалаах. Ол эрэн атын даҕаны ньымалар бааллар эбит.
Эфирнай арыылар
Ол эбэтэр мята уонна розмарин. Бу арыылар киһини олус сэргэхситэллэр эбит. Аҕыйах таммаҕы ытыһыҥ анныгар сыбаатахха, эбэтэр баата дискэтигэр таммалатан аттыгар уурдахха киһи ордук үлэлиир, болҕомтолоох буолар. Маннык ньыма мэйии үлэтин күүһүрдэр. Сорох дьон аҕыйах хааппыланы суунар гельга буккуйан кутар.
Уу
Кофе оннугар уу истэххэ тута сэргэх буолбаккын эрээри, күн устата элбэх уу иһэр туһалааҕа саарбахтаммат. Күҥҥэ аччаабыта 8 чааскы уу испэтэххэ киһи утуктуур, сэниэтэ эстэр. Куйааска яблоко, оҕурсуу сии сырыттахха эбии энергия киириэҕэ. Манна эмиэ элбэх уу баар.
Сөптөөх аһылык
Билигин элбэх киһи диетаны буолбакка, сөптөөх аһылыгы талар. Ол курдук, күүскэ аһаабакка, элбэх оҕуруот аһын уонна күөх оту сиир. Күҥҥэ үстэ аһыыр оннугар кыра-кыралаан биэстэ аһыыр доруобуйаҕа быдан туһалаах. Оннук курдук аһаатахха киһи бастакы нэдиэлэ кэнниттэн тута сэргэхсийэр, туруга тупсар.
Дьарык
Хайаан даҕаны сарсыардаттан сүүрэ барар, ыараханы көтөҕөр наадата суох. Киһи уһуктарыгар 10 мүнүүтэлээх гимнастика сөп буолар. Элбэх күүһү ирдиир тренажернай зал төттөрүтүн киһини сылатар. Маннык дьарык киэһээ өттүгэр ордук туһалаах буолуоҕа.
Үөрүү-дьол
Биллэн турар, стресс киһини олус сылатар, элбэх энергиятын сиир. Ол иһин куруутун утуктуур, сарсыардаттан сылайан турар. Манна барыта киһиттэн тутулуктаах. Долгутар, умсуҕалатар мэһэйдэри туората сатыыр ордук. Кыаллыбат буоллаҕына, ньиэрбэни сынньатар дьарык булар үчүгэй. Холобура, хобби, үөрэх.