23.05.2024 | 12:00

Сайылык күнүн Дьокуускайга бырааһынньыктаатылар

Сайылык күнүн Дьокуускайга бырааһынньыктаатылар
Ааптар: Уйгулана БОЧОНИНА
Бөлөххө киир

Ыам ыйын 18 күнүгэр Дьокуускайга Орджоникидзе болуоссатыгар Сайылык күнүгэр аналлаах тэрээһиннэр аастылар. Бырааһынньык бырагыраамата киэҥ этэ: олохтоох бородууксуйа уонна саха таҥаһын дьаарбаҥката, көрдөөх оонньуулар, саха эстрадатын артыыстарын кэнсиэрэ. Халлаан төһө да тыаллаах, оннооҕор хаардаах да буоллар, болуоссакка дьон бөҕөтө мустубута.

Саха сиригэр Сайылык күнэ 2019 сылтан ыам ыйын 22 күнүгэр бэлиэтэнэр. Бу бырааһынньык саха норуотун уһун үйэлэри уҥуордаан илдьэ кэлбит үгэһин үйэтитии, тыа сирин үлэһит киһитин өрө тутар, инники күөҥҥэ таһаарар сыаллаах олохтоммута. Хороҕор муостааҕы, сыспай сиэллээҕи иитэн олорор өбүгэлэрбит уһун, тымныы кыһын кэнниттэн, от-мас тыллыыта, сайылыкка көһөн тахсар үгэстээхтэрэ.

Болуоссакка киириигэ араас кыыллардаах, көтөрдөрдөөх контактнай зоопарк дьон, ордук оҕо аймах болҕомтотун тардар. Кроликтары, козаны, барааны, үс ньирэйи ким баҕалаах имэрийэн, аһатан, хаартыскаҕа түһэрэн аастаҕа.

Тэрээһиннэр хас да түөлбэҕэ арахсан аастылар: атыы-эргиэн дьаарбаҥката, оонньуулар, күрэхтэһиилэр, “норуот” хартыынатын кырааскалааһын, кэнсиэр, фотозоналар. Болуоссат ортото “Түргэн куб” оонньуу балаһаакката тэлгэммит, ким баҕалаах элбэх кыра кубиктары аҕыйах кэм иһигэр хомуйарга күрэхтэстилэр. Биир күрэхтэһээччинэн Жоржетта Текеянова буолла:

— Горнай улууһун Маҕараһыттан сылдьабын, “Түргэн куб” оонньууга үһүс кыттыым буолар. Бу бэртээхэй оонньуу, түргэнник хамсанан-имсэнэн, кубиктары дьааһыкка хомуйаҕын, манна сымса буолуохха наада. Былырыын манна кэлэн эмиэ кыттыыны ылбытым, алаадьы астаабытым уонна күрэхтэргэ кыттан бириис бөҕөтүн хомуйан барбытым. Быйыл бэйэм баҕабынан туохха барытыгар кыттабын, эрчиллибэккэ даҕаны кэллим, миэстэ, бириис сүрүн буотах. Сайылык уонна ньургуһун күнүнэн итии-истиҥ эҕэрдэ!

Сценаҕа “Күөххэ үктэнии” алгыс сиэригэр-туомугар түптэни буруолатан, ыалдьыттары алаадьынан күндүлээтилэр. Өссө биир интэриэһинэй дьарык—улахан панно хартыынаны бары бииргэ кырааскалааһын. Кыраттан кырдьаҕаска диэри киистэлэринэн сайылык ойуутун кырааскалаан, норуот айымньытын оҥордулар.

Борис Аммосов:

—Усуйаана оройуонун Силээннэээх бөһүөлэгиттэн сылдьабын. Сайын кэлбит бырааһынньыгар үөрэ-көтө кэллим. Бэрт баҕайы күн буолла, киһи эрэ ыллыы туруох курдук. Маннык панноны уруһуйдууру бэркэ тэрийбиттэр, туттар тэриллэри бэлэмнээн биэрбиттэрин кэннэ ис сүрэхпиттэн уруһуйдаан эрэбин! Бэйэм уруһуйдуур дьоҕурдаахпын, дойдубар уһанабын, сахалыы истииллээх ыскамыайкалары, олоппостору оҥоробун.

“Сайылык күнүн көрсө” тэрээһин саха эстрадатын артыыстарын кэнсиэринэн, көрдөөх оонньууларынан түмүктэннэ.

Сонуннар

Ордук ааҕаллар

Дьикти түбэлтэ
Сынньалаңңа | 01.06.2024 | 17:00
Дьикти түбэлтэ
Уйбаан Уйбаанабыс сураҕа суох сүппүтүн туһунан сурах нэһилиэги биир гына тилийдэ. Сарсыарда олус хойуу сиик түспүт этэ. Ойоҕо халдьаайыттан көрөн турдаҕына, эр киһи алааһы бүтүннүү тарҕаммыт күдэрик тумаҥҥа ынахтарын көрдүү киирбитэ уонна ол кэнниттэн ууга тааһы бырахпыттыы мэлийбитэ... Дьахтар бу киһи туман түспүтүн туһанан арыгыһыт доҕотторун диэки сүүрбүт дии санаан,...
Умнуллубут аспытын сөргүтүөххэ
Тускар туһан | 01.06.2024 | 18:00
Умнуллубут аспытын сөргүтүөххэ
Оскуолалар, уһуйааннар ыһыахтара үгэннээн тураллар. Сотору улахан ыһыахтар кэлиэхтэрэ. Ону кытта сахалыы сандалыбытыгар тугу астыырбытын былаанныыбыт. Үгэс буолбут бүлүүдэлэртэн хал буолбут буоллаххытына, өбүгэлэрбит умнулла быһыытыйбыт астарын сөргүтэргэ ыҥырабыт.   Искэхтээх эбэтэр хааннаах алаадьыэ Алаадьы тиэстэтигэр ханнык баҕарар бөдөҥ балык искэҕин кутан буһардахха, ураты уонна тотоойу бүлүүдэ буоларын билэбит. Оттон сорох хотугу...
Былатыан Эверстов:  «Элбэх дьоҥҥо сонуну кэпсиир кыахтаах буолар — дьол»
Дьон | 06.06.2024 | 10:00
Былатыан Эверстов: «Элбэх дьоҥҥо сонуну кэпсиир кыахтаах буолар — дьол»
Хас сир аайы ураты дьон баар буолар. Кинилэр олохторун хара маҥнайгыттан атыннык олоро сатыыллар. Барыларыгар баар курдук нус-хас дьылҕаҕа дураһыйбаттар. Оннук дьикти киһинэн Дьааҥы улууһугар олорор эрээри, өрөспүүбүлүкэ, дойду, аан дойду үгүс бэлиэ спортивнай түгэннэрин көтүппэккэ хамнаһа суох сырдатар суруналыыс, киэҥ сырыылаах айанньыт, коллекционер, фотограф, спортсмен, норуот тапталын ылбыт Платон...