«Саюри» 2,4 тыһыынча туонна оҕуруот аһын үүннэрэр былааннаах
«Саюри» тэпилииссэ комплексын оҥорон таһаарар кыамтата 2023 сылга 2,4 тыһыынча туоннаҕа тиийэрэ былааннанар. Итиннэ оҕуруот аһын араас көрүҥэ киирэр.
«Быйылгы оҥорон таһаарар бородууксуйабыт былаана – 2 400 туонна», - диэн этэллэр хампаанньа бэрэстэбиитэллэрэ.
Өрөспүүбүлүкэҕэ биллэриллибит Үлэ сылыгар анаммыт гражданскай форумҥа, «Саюри» ХЭТ маркетиҥҥа салаатын начаалынньыга Сергей Воронин иһитиннэрбитинэн, 2022 сылга хампаанньа оҥорон таһаарар бородууксуйата 2,1 тыһыынча туоннаттан таҕыста – 1,7 тыһыынча туоннаттан тахса оҕурсу, 411 туонна томат уонна 22 туонна күөх үүнээйи.
Бородууксуйа атыытыттан киирбит барыс – 417 мөлүйүөн солкуобайтан тахса. Сергей Воронин бэлиэтээбитинэн, комплекс Дьокуускай олохтоохторун сибиэһэй оҕуруот аһынан 25% хааччыйар. 2020 сыллаахха хампаанньа эрдэ тутуллубут блоктары саҥардыыны саҕалаабыта, ону тиийэн көрөн-истэн, хаһыаппыт сирэйигэр уонна сайтка сиһилии сырдатан турабыт. 2021 сыллаахха тутууну түмүктүүр үһүс түһүмэх ыытыллыбыта. Ити кэнниттэн оҥорон таһаарыы 66%-нан үрдээбитэ.
Төгүрүк сыл үлэлиир «Саюри» тэпилииссэ комплекса «Саха сирэ» урутаан сайдыы территориятын резиденэ, бырайыак 2016 сыл сааһыттан саҕаламмыта. Итинтэн ыла ирбэт тоҥ усулуобуйатыгар төгүрүк сыл оҕуруот аһын эгэлгэтэ үүннэриллэр.