Сайсары уокуругар 48 хаарбах дьиэттэн дьону көһөрүөхтэрэ

Дьокуускай куорат баһылыгын эбээһинэһин толорооччу Евгений Николаевич Григорьев киин куорат олохтоохторун ыйытыыларыгар хоруйдуур.

–Дьокуускай куоракка учаастак ыларга уопсай уочарат төһө хамсыырый? “Мои документы” кииҥҥэ тиийэ сылдьыбытым, сайабылыанньабын булбатахтара. Уочараппын хантан билэбиний?

Сардана Горбунова

–Уочараккытын электроннай ньыманан көрүөххүтүн сөп. http://www.e-yakutia.ru сайтка киирэҕит, тус кэбиниэккитин арыйаҕыт. Өскөтүн уочарат нүөмэрэ көстүбэт буоллаҕына, анкета толороҕут уонна хос тэҥниигит. Дааннайдар ыйга иккитэ – 5 уонна 15 чыыһылаҕа киирэллэр. Эбэтэр муниципальнай өҥөлөрү оҥорор салаа быһа линиятыгар эрийэн ыйыталаһыаххытын сөп. Төл. 89142394926 (үлэ күнүгэр сарсыарда 09-00 чаастан киэһэ 18-00 чааска диэри (эбиэт кэмэ – 13-00 – 14-00 ч).

–Гимеин сылаас тохтобула тоҕо баччааҥҥа диэри үлэлээбэтий? Дьон кыһыҥҥы тымныыларга оптуобус кэтэһэн, оннооҕор чаас аҥаара тураллар.

Айаал Васильев

–Гимеин суолун эргиирэ саҥаттан тутуллубутун кэннэ сылаас тохтобул төттөрү туруоруллубута. Ол эрээри өрөмүөн үлэтэ эрэйиллэр. Бас билээччи этэринэн, таһырдьа тымныы буолан,  эбийиэги чөлүгэр түһэрии үлэтэ кыаллыбат. Бу туһунан кини уокурук управатыгар биллэрбит.

–Сайсары уокуругар 48 дьиэни көһөрөллөрүн туһунан истибитим. Ол испииһэги ханна көрүөххэ сөбүй?

Лена Сергучева

–Дьокуускай куорат уокуругун хаарбах туруктаах, саахалланар кутталлаах элбэх кыбартыыралаах дьиэлэрин испииһэгин https://cloud.mail.ru/public/Uk1c/Fe6aLhGKE сигэнэн киирэн көрүөххүтүн сөп.

–Автодорожнай уул., 38/24, хаһан көһөрүллэрий? Дьиэбитигэр уубут, гааспыт суох. Кыбартыыра куортамныырга күһэллэбит.

–Саахалланар кутталлаах, хаарбах туруктаах дьиэлэртэн олохтоохтору көһөрүү бырагырааматын https://cloud.mail.ru/public/46uf/3djFHv79j сигэнэн киирэн көрүҥ.

–Сорох оптуобустар терминаллара сүгүн үлэлээбэт эбэтэр алдьаммыт буолар. Оннооҕор үлэлиир, харчылаах каартаны билиммэт, харчыта суох диир. Бэҕэһээ суоппар харчынан төлөө диэбитэ.

Альбина К.

–Аппараата үлэлээбэт эбэтэр алдьаммыт буоллаҕына, суоппар харчынан төлөбүрү көрдүө суохтаах. 

–Оптуобустары ханна эрийэн үҥсүөххэ сөбүй?

Лена

–Тырааныспар управлениетыгар. Төл. 40-80-94

–Борисовка-1 олохтоохторо 6 нүөмэрдээх оптуобус сырыытын уларыппаккытыгар көрдөһөбүт. Үгүс киһи бу оптуобуһунан куоракка кэлэрэ-барара ордук табыгастаах. Ахсынньы ыйга элбэх мэндиэмэннээх дьиэ үлэҕэ киирбитэ. Айанньыт ахсаана өссө элбиэҕэ. Баһаалыста, биһиэхэ 6 нүөмэрдээх оптуобус сырыытын суох оҥорумаҥ!

Светлана Смирнова

–Оптуобус тиһэх тохтобулун уларыппат туһунан быһаарыныы ылыллыбыта. Көннөрү “Три Сосны” микрооройуоҥҥа киирэн ааһар буолуоҕа.