10.12.2023 | 12:00

«Сайра» кэнсиэрбэттэн бүлүүдэ эгэлгэтэ

«Сайра» кэнсиэрбэттэн бүлүүдэ эгэлгэтэ
Ааптар: Розалия Томская
Бөлөххө киир

Судургу бөрүөк

Тиэстэтигэр:

Маргарин эбэтэр ынах арыыта – 200-250 г;

Үүт – ыстакаан аҥаара;

Сымыыт – 4 уст.;

Туус, суода – быһах төбөтүгэр;

Бурдук – төһөнү ыларынан.

 

Начыыныгар:

Сайра  – 2 бааҥка;

Буспут ириис – 1 ыст.;

Луук – 1 уст.;

Майонез – оҕунуохтуурга.

 

Арыыбытын уулларабыт, онно сымыыттарбытын кутабыт, суодалыыбыт, туустуубут. Бурдугу кыра-кыралаан эбэн форматын тутар тиэстэни мэһийэбит. Тиэстэбитин икки өлүүгэ араарабыт. Арыый улаханын духуопка илииһигэр тэлгиибит, ойоҕосторун үрдэтэн уурабыт.

Начыыммытын тэлгиибит. Бастакы дьапталҕа – ириистэн. Иккис – ньыһыллыбыт кэнсиэрбэ, үһүс – кыра гына кырбаммыт луук. Барытын ууран баран үрдүнэн чараастык майонеһынан сыбыыбыт. Майонеһа да суох оҥоруохха сөп, ким хайдах сөбүлүүрүнэн. Майонезтаатахха начыына инчэҕэй буолар.

Тиэстэбит иккис аҥаарын остуолга хатайдыыбыт, бөрүөкпүтүн бүрүйэбит, биилкэнэн онон-манан тэһитэ анньабыт.

30-ча мүнүүтэ 180 кыраадыска духуопкаҕа буһарабыт.

Бу бөрүөк сылаастыы да, сойдоҕуна да олус минньигэс уонна тотоойу.

Лавашка сууламмыт сокууска

Сайра – 1-2 бааҥка;

Лаваш – 3 уст.;

Майонез – сыбыырга;

Укроп, петрушка – биирдии сүүмэх;

Сымыыт – 3-4 уст.;

Кытаанах сыыр эбэтэр ууллубут сыыр – 100 г.

 

Бу сокууска састааба аатырбыт “мимоза” салаат курдук. Сайраны иһиккэ кутан хааһы буолуор диэри биилкэнэн ньыһыйабыт. Лавашпытын майонеһынан сыбаан баран, сайрабытын тэлгэтэбит. 

Петрушканы, укуруобу кыра гына кырбаан сайра үрдүгэр таммалабыт. Иккис лавашпытын ол үрдүгэр уурабыт, майонезтыыбыт, буспут сымыыты түөркэлээн  уурабыт. Ол үрдүгэр үһүс лавашпытын уурабыт, бу сырыыга сыырдыыбыт.

Барытын кытаанах рулет гына эрийэбит, холодильникка чаас аҥаара туруора түһэн баран быһыталаан остуолга биэрэбит.

“Мимоза” диэн сайралаах салааты маннык интэриэһинэйдик рулет оҥорон бырааһынньык да остуолугар уурдахха, бэртээхэй сокууска буолан тахсар.

Сайраттан кэтилиэт

Сайра – 1 бааҥка;

Ириис – 150 г;

Хортуоппуй – 1 уст.;

Панировкалыыр суухара – 50 г;

Укуруоп – 4-5 салаа;

Мас арыыта – 2 ост. нь.;

Хара биэрэс, туус.

 

Ирииспитин, хортуоппуйбутун буһарабыт. Укуруобу кыра гына кырбыыбыт. Сайраны, хортуоппуйу, ирииһи барытын бииргэ ньыһыйан булкуйабыт, туустуубут, биэрэстиибит.

Бу маассаттан кэтилиэттэри оҥорон панировочнай суухараҕа төкүнүтэн ыла-ыла мас арыытыгар ыһаарылаан ылабыт. Кэтилиэттэри оҥорон баран холодильникка уган тоҥоро түстэххэ, ыһаарылыырга ыһыллан хаалбат. Ол эрэн ыксалга тута да ыһаарылыахха сөп.

Ханнык баҕарар гарнирга барсар, элбэх үбү эрэйбэт, балыктан астык кэтилиэт буолан тахсар.

Сибиэһэй хаппыысталаах салаат

Сайра – 1 бааҥка

Хаппыыста – 450 г;

Кэнсиэрбэлэммит горох – 200 г;

Луук – 1-2 уст.;

Күөх луук;

Саахар – 1 ч.нь.;

Туус, хара биэрэс.

 

Горох кэнсиэрбэлэммит эбэтэр сибиэһэй буолуон сөп. Гороҕу үрдүнэн сабар уулаан баран чаайынай ньуоска аҥаара саахардыыбыт, кып-кыратык тууһуубут уонна микроволновкаҕа саамай күүстээҕэр 5 мүнүүтэ уган ылабыт.

Хаппыыстабытын уһун синньигэс гына кырбыыбыт. Чаайынай ньуоска аҥаара саахары, кыра тууһу кутан баран сымныар диэри дэлби убахтаан биэрэбит.

Луукпутун уһун синньигэс гына эбэтэр бытархай кубиктыы кырбыыбыт. Күөх луугу бытархай гына кырбыыбыт.

Горох уутун сүөкээн, сойутабыт. Онно хаппыыстабытын, луукпутун холбуубут.

Сайраны уутун сүөкээн баран ньыһыйан хаппыысталаах горохпутугар кутабыт. Булкуйан баран хара биэрэстиибит. Арыылаах кэнсиэрбэ буоллаҕына, кыратык ол арыытыттан эбиэххэ сөп.

Остуолга биэрэрбитигэр күөх луугу таммалатан киэргэтэбит.

«Одуванчик» салаат

Сайра – 1 бааҥка;

Крекер бэчиэнньэ – 20 г;

Сымыыт – 4 уст.;

Майонез – 150 г.

 

Сымыыппытын буһарабыт. Үрүҥүн уонна араҕаһын тус-туһунан бытархай гына түөркэлиибит.

Кэнсиэрбэлэммит балыкпытын ньыһыйан майонезтыыбыт.

Тэриэлкэбитин майонеһынан сыбыыбыт. Онно крекербитин бытарытан бастакы араҥабытын уурабыт. Ол үрдүгэр майонезтаммыт балыкпытын тэлгиибит. Салҕыы сымыыт үрүҥүн ууран чараастык майонезтыыбыт. Тас өттүгэр сымыыт араҕаһын тэлгиибит. Күөх отунан киэргэтэбит. Хара маслинанан “одуванчикпытыгар” кымырдаҕастары оҥорон киэргэтиэхпитин сөп.

Сайралаах бэрэски

Тиэстэтигэр:

Бурдук – 500 г;

Доруоһа – 2 ч.нь.;

Үүт – 270 мл;

Саахар – 1 ост.нь.;

Туус – ½ ч.нь.;

Сымыыт – 1 уст.;

Ынах арыыта – 70 г;

 

Начыыныгар:

Сайра – 1 бааҥка;

Ириис – 250 г;

Луук – 2 уст.;

Мас арыыта – 5 ост. нь.;

Хара биэрэс.

 

Бурдукпутун иһиккэ үчүгэйдик сиидэлиибит, онно доруоһабытын кутан булкуйабыт.

Туспа иһиккэ үүппүтүгэр сымыыппытын алдьатан кутабыт, араҕаһыттан бэрэскилэрбитин сыбыырга кыратык хаалларабыт. 1 ч.нь туус уонна 1 ост.нь. саахар кутабыт.

Доруоһаламмыт бурдукпутун кыра-кыралаан үүппүтүгэр кутан тиэстэ мэһийэбит. Кытааттаҕына илиибитинэн мэһийэн тиэстэбитин тыынныыбыт. Илиинэн мэһийии бурдукка баар клейковинаны “сайыннарар”, ол иһин киһи илиитин сылааһын билбит тиэстэ олус табыллар.

Начыыммытыгар сайрабытын арыытыттан хостоон туспа ньыһыйабыт, буспут ирииһи холбуубут, луугу ыһаарылаан баран эбэбит. Манна ынах арыытын эбэн минньитэбит. Барытын хобордооххо сылытан ылабыт.

Начыыммыт сойбутун, тиэстэбит үчүгэйдик тахсыбытын кэннэ духуопкаҕа буһар бэрэски оҥоробут. Бэрэскибит үрдүн сымыыт уоһаҕынан сыбыыбыт, кыптыыйынан араастаан кырыйан оһуордуохха сөп.

Эрдэттэн сылытыллыбыт духуопкаҕа 20-чэ мүнүүтэнэн буһан тахсар.

Сонуннар

Ордук ааҕаллар

Замполит Александр:  «Эр санаалаах боотурдары төрөтөр Саха сиригэр сүгүрүйэбин»
Дьон | 12.07.2024 | 12:00
Замполит Александр: «Эр санаалаах боотурдары төрөтөр Саха сиригэр сүгүрүйэбин»
Бу сурук кэлбитин туһунан миэхэ Уус Алдан улууһун социальнай политика салаатын үлэһитэ, хаһыаппар сырдаппыт, анал байыаннай дьайыы саҕаланыаҕыттан үлэлии сылдьар Наталья Охлопкова от ыйын 3 күнүгэр эрийэн, хаһыаккар таһаарыаҥ дуо диэбитин тута сөбүлэспитим. Онон, сурук хайдах баарынан тылбаастаан, ааҕааччыларбар тиэрдиэм, Саха сирэ дьоруойдарын билиэхтээх!   “Наталья, дорообо! Мин аатым Александр. Мин...
Истиҥник санаан
Дьон | 05.07.2024 | 20:38
Истиҥник санаан
(Учууталбар Раиса Реасовна Кулаковскаяҕа ананар)
Светлана Дьяконова: «Саҥаттан ыал буолан эрэр курдукпут...»
Дьон | 04.07.2024 | 16:00
Светлана Дьяконова: «Саҥаттан ыал буолан эрэр курдукпут...»
Быйылгы халаан Хатырык нэһилиэнньэлээх пуунун олох үөйбэтэх өттүттэн ылан, олохтоохтору ууга-уокка түһэрбитин ааһан, уйулҕаларыгар да охсуу ыллылар, күн бүгүн ол содулун туоратыыга күүскэ үлэлииллэр, кэлэн ааспыт иэдээни оһоруналлар.   Светлана Васильевна Дьяконова, Хатырык олохтооҕо, биэнсийэлээх, култуура эйгэтигэр 35 сыл үлэлээн, “Култуура туйгуна” бэлиэлээх үлэ бэтэрээнэ, бүгүн ааҕааччыларга халаан иэдээнин туһунан кэпсиир:...
Туймаада ыһыаҕын туһунан дьон санаата
Сонуннар | 04.07.2024 | 14:00
Туймаада ыһыаҕын туһунан дьон санаата
Туймаада ыһыаҕа ыһыллар Үс Хатыҥ сирэ-уота куорат кииниттэн төһө да ыраах турдар, норуот уустук айаны, араас мэһэйдэри аахсыбакка, бииргэ мустар үөрүүтүн билээри, алгыс баһын сыалаары, кэлэр сылга күүс эбинээри, быйыл номнуо үйэ чиэппэриттэн ордук саараабакка дьулуһар. Быйылгы ыһыах тэрээһинин туһунан норуот санаатын билсээри, ыйынньыктарынан сирдэтэн, түһүлгэлэринэн хаамтыбыт.   Бастатан туран, оптуобус....