Сарсын саҥа дьыллааҕы харыйа уота умайыаҕа

Сарсын, ахсынньы 1 күнүгэр, Дьолкуускайга Ленин болуоссатыгар өрөспүүбүлүкэ сүрүн харыйатын дьэрэкээн уоттарын уматар үөрүүлээх тэрээһин буолуоҕа. Коронавирус дьаҥа тарҕаммытынан, элбэх дьон тоҕуоруһуулаах тэрээһиннэр бары бобуллан тураллар. Онон быйыл саҥа дьыллааҕы харыйа уотун уматыы сиэрэ-туома онлайн ньыманан ыытыллыаҕа.

“Саха” көрдөрөр-иһитиннэрэр хампаанньа уонна “Якутия 24” ханаалларга быһа эфиргэ саҥа дьыллааҕы харыйа уоттарын уматыы күнүс 15.30 чааска көстүөҕэ.

Маны тэҥэ кэккэ улуустары кытта быһа холбонуу, харыйалар уоттарын уматыы буолуоҕа. Бырааһынньык сүрүн дьоруойа Чысхаан тымныы полюһуттан Өймөкөөн улууһун Эбэ Хайатыттан тымныы символын – күндү тааһы, Тымныы Оҕуһун муоһун эмтэркэйин  - өрөспүүбүлүкэ Ил Дарханыгар Айсен Николаевка туттарыаҕа.

Саха сирин олохтоохторун Великий Устюг куораттан Тымныы Моруос Оҕонньор эҕэрдэлиэҕэ. Быһа эфири Опера уонна Балет театрын, Эстрада артыыстара киэргэтиэхтэрэ.