Сарсыардааҥҥы дьарык сөргүтүлүннэ

Дьокуускай болуоссаттарыгар уонна сквердэригэр сарсыардааҥҥы сэрээккэлэр дьону-сэргэни түмэн эрэллэр. Дьарыктары тренердэр уонна инструктордар салайан ыыталлар. 
«Сарсыардааҥҥы дьарыктар «Сарсыарданы кыайыыттан саҕалаа – бэйэни кыайыыттан!» диэн сүрүн этиинэн  бараллар. Хас биирдии инструктор бэйэтэ туспа хайысхалаах үлэлиир. Холобур, скандинавскай хаамыы, тайцзицюань, сүһүөх гимнастиката, чэбдигирдэр гимнастика уо.д.а. хайысхалар», – диир СӨ физическэй култуураҕа уонна спорка миниистирин солбуйааччы  Александр Бугаев. 

Бастакы сэрээккэ сарсыарда 6.30 чаастан норуоттар Доҕордоһууларын болуоссатыгар саҕаланар. 
Эти-хааны чэбдигирдэр дьарыктар Ленин, Орджоникидзе уонна Кыайыы болуоссаттарыгар, ону сэргэ Култуура уонна сынньалаҥ пааркатыгар, «Туймаада” стадиоҥҥа уонна 17-с кыбаарталга «Меркурий” атыы-эргиэн киинин иннигэр сарсыарда 7 чаастан буолаллар. 
Итиннэ эбии ыам ыйын 24 күнүттэн эрчиллиилэр 7.15 чаастан Саха циркэтин иннигэр буолуохтара.