Сардана Авксентьева II-c Аан дойду сэриитэ түмүктэммит күнүнэн эҕэрдэлиир

Ытыктабыллаах Дьокуускай куорат олохтоохторо! Сэрии уонна тыыл бэтэрээннэрэ, сэрии кэмин оҕолоро! Дьокуускай куорат дьаһалтатын уонна тус бэйэм ааппыттан II-c Аан дойду сэриитэ түмүктэммит күнүнэн ис сүрэхпиттэн эҕэрдэлиибин.1945 сыллаахха балаҕан ыйын 2 күнүгэр Япония кыайтарыытынан II-c Аан дойду сэриитэ түмүктэммитэ. Бу сэриигэ уонунан мөлүйүөн киһи сырдык тыына быстыбыта, тыһыынчанан куорат урусхаламмыта уонна мөлүйүөнүнэн киһи олоҕо алдьаммыта.Хаан тоҕуулаах сэрии ыар ыйааһынын Аҕа дойду Улуу сэриитин геройдара – биһиги аҕаларбыт, эһэлэрбит, хос эһэлэрбит сүкпүттэрэ. Кинилэр Арҕаа ньиэмэс фашистарын, Илин дьоппуон милитаристарын кытта кыргыһыыга олохторун толук уурбуттара. Тыылга хаалбыттар, аччыктыыры, тоҥору билиммэккэ, Кыайыыны уһансыбыттара. Кыайыы историятыгар, норуоттары, дойдулары босхолооһуҥҥа сэбиэскэй норуот, биһиги дойдубут суолтата сүҥкэн. Сэрии түмүктэниэҕиттэн 75 сыл ааста, биһиги дойдубут Кыайыыны ыар сүтүктээх көрсүбүтэ. Арассыыйаҕа, Саха сиригэр сэрии алдьархайын билбэтэх дьиэ кэргэн суох. Биһиги өрөспүүбүлүкэбититтэн 62 000 саллаат фроҥҥа аттаммыта, онтон үс гыммыттан биирэ Дьокуускай куораттааҕы байыаннай кэмитиэттэн ыҥырыллыбыта. Үгүстэрэ дьиэлэригэр эргиллибэтэхтэрэ, Ийэ дойдуларын туһугар олохторун толук уурбуттара. Улуу Кыайыы 75 сылынан Дьокуускай куоракка Көлүөнэлэр сыллара биллэриллибитэ. Бүгүн биһиги бэтэрээннэрбитин, сэрии кыттыылаахтарын, тыыл бэтэрээннэрин, сэрии кэмин оҕолорун чиэстиибит. Ийэ дойдубутун өстөөхтөртөн көмүскээбит мөлүйүөнүнэн ахсааннаах сэбиэскэй саллаат, биир дойдулаахтарбыт сырдык ааттарын кэриэстиибит. Ытыктабыллаах бэтэрээннэр, эһиэхэ кытаанах доруобуйаны, чэбдик туругу ис сүрэхпиттэн баҕарабын. Куорат олохтоохторугар или-эйэни, бары үтүөнү уонна этэҥҥэ буолууну!

Дьокуускай куорат баһылыга Сардана Авксентьева