Санкциялар ВОЛСка мэһэйдээбэттэр

Куорат нэһилиэктэригэр волоконнай-оптическай сибээһи тардыы салҕанар. 2022 сылга уопсайа 30 тыһыынча ыал дьиэтигэр түргэн сибээс киирэрэ күүтүллэр. Үлэ Дьокуускай куорат дьаһалтатын, «ТТК» хампаанньа уонна «Диапазон» бэдэрээтчит тэрилтэ икки ардыларыгар 2021 сылга түһэрсиллибит сөбүлэһии чэрчитинэн ыытыллар.

«ТТК» хампаанньа иһитиннэрбитинэн, бу күннэргэ волоконнай-оптическай  сибээһи Белай Озеро, Хатыҥ Үрэх оройуоннарыгар уонна 17-с кыбаарталга тарда сылдьаллар. Хампаанньа, бырайыак тыын социальнай суолталааҕынан итиэннэ аан дойдуга бүрүүкээбит балаһыанньаны өйдөөн туран, чугастааҕы 15 сылга барыһа да суох үлэлииргэ бэлэм.

Бэлиэтээн эттэххэ, куорат таһынааҕы нэһилиэнньэлээх пууннарга GPON технология туһаныллар. Бу ньыма линия былаһын тухары оптоволокнону туһанар буолан, удамыр ороскуокка хаачыстыбалаах сибээһи хааччыйар уратылааҕынан биллэр. Оптическай сигналы ыраахха биэрэригэр даҕаны элбэх электроэнергияны сиэбэт. Сигналы түҥэтэригэр өҥөнөн туһанааччы оборудованиетыгар наадыйбат.

Билигин бу сибээһинэн Мархаҕа уон тыһыынча ыал, “Сатал” СОНТ уонна Хатас бөһүөлэгэр үс тыһыынча дьиэ холбонон тураллар. Уопсайа туһааннааҕынан 250 уонна 80 км уһуннаах сибээс волоконнай-оптическай линията тардыллан сытар. Оттон төлөбүрэ куорат сүрүн тарыыптарыттан уратыта суох.

Социальнай суолталаах бырайыак

Павел Кириллин, Дьокуускай куорат баһылыгын сүбэһитэ:

— Дьокуускай куорат таһынааҕы нэһилиэктэргэ оптоволоконнай сибээс линиятын тардыы – тыын социальнай уонна инфраструктураны сайыннарар суолталаах бырайыак. Биллэрин курдук, аҕыйах нэһилиэнньэлээх, бэйэ-бэйэлэриттэн тэйиччи турар чааһынай дьиэлэрдээх бөһүөлэккэ сибээс линиятын тардар хайа баҕар операторга ночооттоох. Куорат үрүт-үөһэ тутуллубут элбэх мэндиэмэннээх дьиэлэригэр тардан, сотору кэминэн ороскуоттарын толунарга дьулуһаллара биллэр. Оттон манна эмиэ биһиги куораппыт нэһилиэнньэтэ, сүрүннээн элбэх оҕолоох ыаллар олороллор. Кэлиҥҥи сылларга үөрэх кыһалара, үлэ тэрилтэлэрэ даҕаны тэйиччиттэн үлэлиир көрүҥҥэ көһөрүллэннэр, ордук бу кытыы нэһилиэктэр бытаан, мөлтөх сибээс кыһалҕатын биллилэр. Бу сүҥкэн суолталаах  инфраструктурнай бырайыак чааһынай инвестор үбүнэн олоххо киирэр. Ол эбэтэр куорат, өрөспүүбүлүкэ даҕаны бүддьүөттэриттэн үбүлэммэт.

Биллэн турар, дойду балаһыанньата уустугурда, ол да буоллар куорат нэһилиэктэрин үрдүк хаачыстыбалаах сибээс линиятынан хааччыйар үлэ салҕанар.

Түргэн ситим

Санатан эттэххэ, волоконнай-оптическай сибээс ситимин тардыы куорат баһылыга Евгений Григорьев быыбар иннинээҕи бырагырааматыгар киллэриллибитэ.

2021 сыл балаҕан ыйын 1 күнүгэр саҥа сибээс номнуо Марха бөһүөлэгэр уонна «Сатал» микрооройуоҥҥа киирбитэ. Ахсынньы ыйга сибээс ситимин волоконнай-оптическай линияларын холбуур үлэлэр маннык аадырыстарга  түмүктэммиттэрэ: «Айхал» ТСН, Газовиктар бөһүөлэктэрэ, «Чолбон» СОНТ, «Сатал» СОНТ 10-с кыбаартала уонна «Победа-2012» СОНТ. Хатас сэлиэнньэтигэр саҥа интэриниэт график быһыытынан олунньу 1 күнүгэр киирбитэ. Онон билигин бу оройуоннар олохтоохторо түргэн тэтимнээх интэриниэккэ холбонон олороллор. Саҥа абоненнарга тарыыптара 850 солк. 30 мбит/с., ону таһынан элбэх оҕолоох ыаллар сүрүн тарыыптарыгар чэпчэтии көрүллэр.

Ыспыраапка: 
«ТрансТелеКом» хампаанньа 1997 сыллаахха тимир суолларга сибээс операторын быһыытынан тэриллибитэ. Ол курдук өссө 20-с үйэҕэ бэрт кылгас кэм иһигэр тимир суолу кыйа оптоволоконнай сибээс ситимин туппута. Бу ситим саҥа үйэ сибээһин акылаата буолбута. 
Нэһилиэнньэни уонна орто уонна дьоҕус бизнеһи сибээс өҥөтүнэн хааччыйыы 2008 сылтан олоххо киирэр.
2012 сылга «ТрансТелеКом» хампаанньа Саха сиригэр Тыында-Дьокуускай учаастакка историяҕа бастакы волоконнай-оптическай линияны тутан үлэҕэ киллэрбитэ. Дьокуускайга уонна Нерюнгрига табыгастаах инфраструктуралары тэрийэн, бу куораттар нэһилиэнньэлэригэр үрдүк хачыстыбалаах сибээһи бэлэхтээбитэ.
 2017 сылга Саха сиригэр «Развитие телерадиовещания в Российской Федерации на 2009–2018 годы» федеральнай тус сыаллаах бырагырааманы олоххо киллэрии чэрчитинэн цифровой араадьыйа уонна телевидение эбийиэктэрин тутууга киэҥ далааһыннаах бырайыак түмүктэммитэ. Хампаанньа айылҕа уустук усулуобуйатыгар кылгас болдьох иһигэр Саха сиригэр 150 телевизионнай станцияны холбоон, мөлүйүөн кэриэтэ нэһилиэнньэлээх өрөспүүбүлүкэ бүттүүнэ цифровой биэриилэри көрөр уонна истэр буолбуттара. 
«ТТК» АУо бүгүн бөдөҥ интэриниэт ситимин провайдера.