Самоизоляцияттан сыыйа тахсыахпытын сөп

Дьокуускай баһылыга Сардана Авксентьева коронавирус тарҕаммытынан олохтоммут хааччахтартан тахсыы былаанын Ил Дархан Айсен Николаевка ыытта.

Хааччахтары сымнатыы бэс ыйын 15 күнүттэн саҕаланыан сөп. Бу күнтэн ыла парикмахерскайдар, кэрэ буолуу салоннара, уопсай аһылык тэрилтэлэрэ, баанньыктар, сауналар, солярийдар, бассейыннар уонна атыы-эргиэн тэрилтэлэрэ үлэлэрин сөргүтүөхтэрин сөп.

Ол эрэн кэккэ хааччахтар оннуларынан хаалыахтара. Холобур, уопсай ыһылык тэрилтэлэрэ аһы тиэрдэн биэриигэ эрэ үлэлиэхтэрин сөп. Атыы-эргиэн тэрилтэлэрэ атыылаһааччылары 4 кв.м. биир киһи буолар гына суоттаан киллэрэллэрэ көҥүллэниэн сөп.

Айсен Николаев бүгүҥҥү брифинигэр иһитиннэрбитинэн, коронавирус тарҕаныытын коэффициенэ 0,89 буолбут, ыарыһах ахсаанын эбиллиитэ 2 % тэҥнэһэр.