Салалта федеральнай бырагыраамаларынан өрөмүөннэнэр эбийиэктэри бэрэбиэркэлиир

Өрөспүүбүлүкэ Ил Дархана Айсен Николаев уонна куорат баһылыга Евгений Григорьев федеральнай үбүлээһининэн оҥоһуллар Бабушкин уулуссатын уонна куорат 13 №-дээх оскуолатын хапытаалынай өрөмүөннэрин бэрэбиэркэлээтилэр.
Евгений Григорьев бэлиэтээбитинэн, Бабушкин уулуссатын Сэбиэскэй Аармыйа 50 сыла уулуссаттан Очиченко уулуссатыгар диэри учаастага – былырыыҥҥыттан оҥоһуллар эбийиэк. 
«Үлэ быйыл түмүктэниэхтээх. Тас коммуникацияны, уу ситимин барытын көһөрүүттэн саҕалаан, суол таҥаһын тутар буору уларытыыга тиийэ хабааннаах үлэ барар турар. Бэдэрээтчит «Дороги Саха» тэрилтэ», - диир Евгений Григорьев.
Сакаасчыт «Главстрой» МХТ салайааччыта Алексей Варламов иһитиннэрбитинэн, атырдьах ыйа бүтүөр диэри аспаалы ууруу түмүктэниэхтэх, ол кэннэ тупсарыы, бордюр, тротуар үлэтэ, суол бэлиэлэрин ууруу хаалар. 
13 №-дээх оскуола хапытаалынай өрөмүөнэ эмиэ графиктан хаалыыта суох бара турар. Тутуу 70 % бэлэм, матырыйаал барыта баар. 
Бэлиэтээн эттэххэ, үөрэх тэрилтэлэрин модернизациялааһыҥҥа туһуланар федаральнай бырайыагынан быйыл Дьокуускай куоракка 13 оскуолаҕа хапытаалынай өрөмүөн ыытыллар: 5, 7, 12, 13, 19, 24, 26, 38 (икки дьиэ), 39 № № -дээх оскуолаларга, Национальнай гимназияҕа уонна Табаҕа, Хатас, Маҕан нэһилиэктэрин оскуолаларыгар.
Тэҥнээн көрүүгэ: 2022 сыллаахха 11 оскуола өрөмүөннэммитэ, 2023 сылга – 13, 2024 сылга  – 9. Маннык тэтиминэн куорат бары оскуолата хапыталаанынай өрөмүөнүнэн хабыллар.