Сахастат мобильнай биригээдэлэрэ биэрэписчиктэргэ көмөлөһөллөр

Бүтүн Арассыыйатааҕы нэһилиэнньэ биэрэпиһин сүрүн түһүмэҕэ  түмүктэнэрэ үс хонук хаалла. Өрөспүүбүлүкэ нэһилиэнньэтин сүрүн өттө биэрэпискэ кытынна, 19,8% эбэтэр хас биирдии бэһис киһи «Госуслуги» портал нөҥүө суруйтарда. Дьон ордук МФЦ офистарыгар, «Энергосбыт» каассаларыгар уонна «Почта России» салааларыгар баар стационарнай учаастактарга сөбүлээн сылдьара бэлиэтэнэр.  
Итини сэргэ дьиэҕэ кэлбит биэрэписчиктэргэ суруйтарыахха сөп. 
Нэһилиэнньэ биэрэпиһин 2002 уонна 2010 сыллардааҕы үтүө уопутугар олоҕуран, Сахастат биэрэписчиктэргэ көмөлөһөргө бэйэтин үлэһиттэриттэн састааптаан мобильнай биригээдэлэри тэрийбит. 
Уһун өрөбүллэр Бүтүн Арассыыйатааҕы нэһилиэнньэ биэрэпиһин хаамыытын уларыппатахтар, үлэ урукку эрэсииминэн барбыт.  Биэрэписчиктэр этэллэринэн, дьон ити күннэргэ дьиэлэригэр баар буоланнар, кинилэр үлэлэрэ судургутуйан биэрбит. Мобильнай биригээдэлэр локдаунтан саҕалаан билиҥҥэ диэри куорат уокуругун биэрэпискэ учаастактарынан нэһилиэнньэ бүттүүнүн хабар сыаллаах үлэлииллэр. 
Биэрэпис регион социальнай-экономическай өттүнэн сайдыытыгар ураты суолталааҕын өйдүүр буолан, биэрэпискэ СӨ судаарыстыбаннай былааһын ситэриилээх уорганнарын 23 бэрэстэбиитэлэ уонна куорат уокуругуттан 32 киһи үлэлэһэ сылдьаллар.