Саха төрүт култууратын өйүүр Ыйаахха илии баттанна

Ил Дархан Айсен Николаев Саха өрөспүүбүлүкэтин эпоһын харыстыыр уонна бөҕөргөтөр ыйаахха илии баттаата.

Үөһээ Бүлүүгэ ыытыллар Олоҥхо Ыһыаҕын аһыллар үөрүүлээх күнүгэр  «Олоҥхо дьиэлэрин биир кэлим ситимин уонна олоҥхоһуттары, оһуохайдьыттары, уустары – төрүт култуураны илдьэ сылдьар дьону судаарыстыба өйүүрүн туһунан» ыйаах олоххо киирдэ.

“Бу ыйаах өбүгэлэрбит хаалларбыт нэһилиэстибэлэрин харыстыырга уонна көлүөнэттэн көлүөнэҕэ салгыы биэрэн иһэргэ төһүү күүс буолуоҕа. Бастатан туран, Олоҥхо дьиэлэрин биир ситимҥэ холбуоҕа, ый аайы 30 тыһ. солк. стипендия олохтонуоҕа – төрүт култуураны илдьэ сылдьар дьоҥҥо төлөнүөҕэ: олоҥхоһуттарга, оһуохайдьыттарга, уустарга. Бырайыактары өйөөһүҥҥэ  уонна Олоҥхо дьиэлэрин тупсарыыга сыллата 50 мөл. солк. туһуланыаҕа”, - диэн Айсен Николаев телеграмм-ханаалыгар суруйда.

Санатан эттэххэ, бу күннэргэ Үөһээ Бүлүүгэ 15-с төгүлүн Олоҥхо Ыһыаҕа буола турар. Саха АССР 100 сылыгар Олоҥхо Ыһыаҕа биир сүрүн тэрээһин буолла. Быйыл бастакытын “Юнеско шедеврдэрэ Олоҥхо дойдутугар” диэн норуоттар икки ардыларынааҕы бэстибээл ыытыллар. 100-тэн тахса сиэр-туом, спорт тэрээһинэрэ буолаллар.