«Саха сирин талааннара» ыҥырар!

«Саха сирин талааннара» – Саха сирин саҥа лидердэрэ буолар сыаллаах-соруктаах эдэр дьоҥҥо аналлаах куонкурус. Дьыалабыай оонньуу өрөспүүбүлүкэтээҕи “МИНИИСТИР» киэбинэн ыытыллар. 
Күрэххэ 18-тан 45-гэр диэри саастаах устудьуоннар, эдэр исписэлиистэр уонна салайааччылар ыҥырыллаллар. Сайаапкалары балаҕан ыйын 27 күнүттэн алтынньы 26 күнүгэр диэри туталлар. Сиһилии куонкурус туһунан мантан аллараа сэһэргиэм.

Куонкурус сыала:

Өрөспүүбүлүкэ үрдүнэн 300 талааны арыйыы.

Тэрийээччилэр бу ахсаан иһиттэн Саха өрөспүүбүлүкэтин социальнай-экономическай сайдыытын стратегиятын соругун ситиһиини хааччыйар кэскиллээх исписэлиистэри уонна салайааччылары сүүмэрдииллэр.

Ким кыттыан сөбүй:

Өрөспүүбүлүкэ инники сайдыытыгар уонна уопсастыбаҕа уларыйыылары олоххо киллэрэргэ бэлэм эдэр дьон. Кыттааччы 18-тан 45-гэр диэри саастаах Арассыыйа олохтооҕо буолара ирдэнэр. 2019 сыллааҕы  ("МИНИИСТИР") өрөспүүбүлүкэтээҕи дьыалабыай оонньуу кыайыылаахтара кытталлара көҥүллэммэт.

Наҕараадалара:

Куонкурус түмүгүнэн 300 финалист «LAB.TALENT» аһаҕас компетенциялары сайыннарыы бырагырааматынан үөрэх кууруһун ааһыаҕа.

«LAB.TALENT» үөрэх бырагырааматын чэрчитинэн 10 кыайыылаах СӨ граннарын, үөрэххэ эбии куурустары ылары ситиһиэхтэрэ. Ону тэҥэ өрөспүүбүлүкэ кадровай резервэтигэр киириэхтэрэ.

«Саха сирин талааннара» бырайыак кыттыылаахтара түөрт түһүмэҕи ааһыахтаахтар. Кинилэр хас биирдии салааҕа саҥа билиини-көрүүнү, үөрүйэхтэри ылыахтарын сөп, үлэһиттэр сайдыыларыгар уопуттаах исписэлиис сүбэлэрин ылыахтара.

Күрэх бары түһүмэҕэ дистанционнай халыыбынан ыытыллыаҕа. Сайаапкаларгытын https://komanda.sakha.gov.ru/ru-RU/ya-talant сайтка киирэҥҥит хаалларыҥ.