Саха сирин талааннаах оҕолоро наҕараадаланнылар
Ил Түмэн ыччат дьыалаларыгар, физическэй култуураҕа уонна спортка сис хамыыһыйатын бэрэссэдээтэлэ Михаил Гуляев, СӨ физическэй култуураҕа уонна спортка миниистирин солбуйааччы Гаврил Мохначевскай, СӨ култуураҕа уонна духуобунай сайдыыга миниистирин солбуйааччы Марина Силина уонна Пуонда бэрэстэбиитэллэрэ кыайыылаахтары эҕэрдэлээтилэр уонна гырааннары туттардылар.
«Бу бэртээхэй түгэн. Эһиги саамай үрдүк таһымҥа Саха сирин дэгиттэр талаанын көрдөрөҕүт уонна өрөспүүбүлүкэ чиэһин көмүскүүгүт. Эҕэрдэлиибин уонна талбыт хайысхаларгытынан саҥа чаҕылхай үрдэллэри баҕарабын. Бу – элбэх сыллаах үлэҕит, төрөппүттэргит уонна салайааччыларгыт улахан кылааттарын түмүгэ», — диэтэ Наукалар аччыгый академияларын ректора Василий Павлов.
Саха сирин Үүнэр көлүөнэтин пуондатын Целевой бырагыраамаларга управлениетын начаалынньыга Сардана Попова кэпсээбитинэн, быйыл куонкуруска 147 сайаапка киирбит. Гырааннары Пуонда «Кэлэр кэм туһугар» целевой бырагырааматын чэрчитинэн «АЛРОСА» үбүлээбит.
«Регионнааҕы киини кытта бииргэ куонкуруһу иккис сылын ыытабыт. Сүрүн критерий – кыттааччы өрөспүүбүлүкэтээҕи, Бүтүн Арассыыйатааҕы, норуоттар икки ардыларынааҕы күрэхтэһиилэр, олимпиадалар уонна конференциялар кыайыылаахтара буолуохтаах. Маннык өйөбүл саҥа ситиһиилэргэ уонна идэтийии таһымын үрдэтиигэ төһүү күүһүнэн буолуоҕа диэн эрэнэбин», — диэтэ пуонда бэрэстэбиитэлэ.
Сонуннар
Ордук ааҕаллар
