Саха сирин режиссера «Бастыҥ дебют» бириискэ тигистэ

Тула куоракка ыытыллыбыт байыаннай киинэ бэстибээлигэр Саха сирин режиссера Дмитрий Кольцов «Рядовой Чээрин» киинэтин иһин «Бастыҥ дебют» бирииһинэн наҕараадаланна. Бэстибээлгэ Арассыыйаттан уонна атын дойдулартан барыта 80 киинэ кытынна.
«Рядовой Чээрин» киинэҕэ фашист снайпердарын кытта хабыр хапсыһыыга киирсибит саха булчутун туһунан кэпсэнэр. Бу киинэ саха фронтовик-суруйааччыта Тимофей Сметанин 1947 сыллаахха суруйбут «Егор Чээрин» сэһэнинэн уһуллубут. Байыаннай хартыынаны YouTube ханаалыгар 12 мөлүйүөнтэн тахса киһи көрбүт. Итини сэргэ Кыайыы күнүгэр СТС ханаалга «Рядовой Чээрин» премьерата буолбута. 
Юрий Озеров аатынан XX-с Норуоттар икки ардыларынааҕы байыаннай киинэ бэстибээлэ Тула куоракка ыам ыйын 16-21 күннэригэр ыытылынна. Быйылгы бэстибээл Сталинград кыргыһыытын 80 сылыгар ананна. 
Барыта 32 балаһааккаҕа киинэлэри көрдөрүү, пресс-конференциялар, айар көрсүһүүлэр уонна маастар-кылаастар, «Шаг навстречу кино» үөрэтэр балаһаакка ыытылыннылар. Көрөөччүлэр уонна дьүүллүүр сүбэ чилиэннэрэ араас хайысхалаах киинэлэри – документальнайтан саҕалаан сериалларга диэри билистилэр.