Саха сирин олохтооҕун каартата бэриллэр буолла

От ыйын 8 күнүттэн өрөспүүбүлүкэ территориятыгар Саха сирин олохтооҕун каартатын биэрии саҕаланна. 
Каартаны саҥа үлэлээбит www.card.sakha.gov.ru сайтка киирэн оҥотторуохха, туттар быраабылалары уонна каартанан чэпчэтии оҥорор тэрилтэлэр испииһэктэрин кытта билсиэххэ сөп. Бастакы түһүмэххэ бырайыак өрөспүүбүлүкэ биэс нэһилиэнньэлээх пуунугар үлэлиэҕэ. 
Саха сирин олохтооҕун каартата нэһилиэнньэ судаарыстыбаннай уонна муниципальнай өҥөлөрүнэн туһанарын судургутутар, төлөбүр сервистарынан туттарга эмиэ табыгастаах буолар. Ол туһунан Алмазэргиэнбаан бырабылыанньатын бэрэссэдээтэлэ Николай Долгунов эттэ. 
«Дьиэ кэргэн, таптал уонна бэриниилээх буолуу Бүтүн Арассыыйатааҕы күнүгэр өрөспүүбүлүкэ баһылыга Айсен Николаев Саха сирин олохтооҕун бастакы каарталарын «Таптал уонна бэриниилээх иһин» мэтээлинэн наҕараадаламмыт уонна элбэх оҕолоох ыалларга туттартаата. Түгэнинэн туһанан, Алмазэргиэнбаан аатыттан регион олохтоохторун бырааһынньыгынан эҕэрдэлиибин», - диэтэ Николай Долгунов.
Кини этэринэн, каарта чэпчэтиилээх статус дастабырыанньатын уонна биир кэлим социальнай проезднойу солбуйар. Ону таһынан баан каартата буолар уонна «СВОИ» бырагырааманан  кешбэк ылар кыах биэрэр. Каартаҕа биэнсийэни уо.о.д.а. социальнай төлөбүрдэри түһэриэххэ сөп. 
Санатан эттэххэ, 2021 сыл от ыйын 1 күнүттэн алтынньы 1 күнүгэр диэри каартаны Дьокуускай, Нерюнгри, Ньурба, Мирнэй куораттар уонна Бэрдьигэстээх чэпчэтиинэн туһанар (льготалаах) олохтоохторо оҥотторуохтарын сөп. Чэпчэтиилээх категориялар толору испииһэктэрэ card.sakha.gov.ru сайтка баар.
Алтынньы 1 күнүттэн каартаны 14 саастарыттан үөһээ Саха сирин бары олохтоохторо оҥотторор кыахтаныахтара.