Саха сирин нэһилиэнньэтин ахсаанын сыл бүтүөр диэри чопчулуохтара

Киирии тылга хамыыһыйа бэрэссэдээтэлэ, СӨ экономикаҕа миниистирэ Майя Данилова бэлиэтээбитинэн, нэһилиэнньэ биэрэпиһин бэлэмнээһин уонна ыытыы бары тэрээһиннэрэ толору оҥоһулуннулар. 

Быйыл аан бастакы төгүлүн нэһилиэнньэ биэрэпиһин ыытыы быраактыкатыгар, респонденнар биэрэпис лиистэригэр бэйэлэрин уонна дьиэ кэргэн чилиэннэрин дааннайдарын «Судаарыстыбаннай уонна муниципальнай өҥөлөр биир кэлим порталларыгар» электроннай пуорманан толордулар.

Сахастат салайааччыта Ирина Гаевая 2021 сыл алтынньы 15 күнүттэн сэтинньи 14 күнүгэр диэри ыытыллыбыт биэрэпис сүрүн түмүктэрин билиһиннэрдэ. Биэрэпис түмүгүнэн, Саха сирин нэһилиэнньэтэ, 2021 сыл алтынньы 1 күнүнээҕи туругунан нэһилиэнньэ ахсаана 995,7 тыһыынча киһиэхэ тэҥнэстэ. 2010 сыллааҕы биэрэпиһи кытта тэҥнээтэххэ 37,2 тыһыынча киһинэн, эбэтэр 3,9 % үрдээтэ.

Куоракка көһөн кэлии элбээтэ: 66,8% нэһилиэнньэ куоракка олорор, 33,2% – тыа сиригэр. 2010 сылга куорат нэһилиэнньэтэ – 61,4%, тыа сиригэр – 39,5%.