Саха сирин медиктэрэ – «Здоровье нации – 2021» күрэх кыайыылаахтара

Саха сирин медиктэрэ Москваҕа ыытыллыбыт Бүтүн Арассыыйатааҕы «Здоровье нации – 2021» куонкурус кыайыылаахтарынан буоллулар. Ол туһунан доруобуйа харыстабылын министиэристибэтин пресс-сулууспата иһитиннэрдэ. 
Күрэххэ Арассыыйа 15 регионун бэрэстэбиитэллэрэ кыттыбыттар. Нация доруобуйатын Лигатын Бэрэсидьиэнэ, форум тэрийэр кэмитиэтин кыттыгас бэрэссэдээтэлэ Академик Лео Антонович Бокерия Саха сирин медиктэригэр «Бастыҥ дизайн-бырайыак» номинацияҕа бастыҥ экспозиция уонна «Лучший креативный подход» номинацияҕа быыстапка тематыгар сөп түбэһии иһин диплом туттарда. Уопсайа 50-ча кыттааччы бэйэлэрин стендэлэрин көрдөрбүттэр.
От ыйын 13-15 күннэригэр ыытыллыбыт форум сүрүн темата – «Укрепление общественного здоровья – сфера взаимной ответственности государства и граждан». Форум кыттыылаахтара уопсастыба доруобуйатын бөҕөргөтүүгэ бииргэ үлэлээһин боппуруостарын көрбүттэр уонна коронавируснай инфекция пандемиятын усулуобуйатыгар балтараа сыллаах үлэлэрин түмүгүн таһаарбыттар. 
Быйылгы сылга Саха сирин доруобуйа харыстабылыгар Министиэристибэтэ нэһилиэнньэҕэ оҥоһуллар медицинскэй көмө хаачыстыбатын тупсарыыга анаммыт түөрт бырайыагы көрдөрбүт.