Саха сирин медицинскэй үлэһиттэригэр хамнас төлөбүрүн саҥа систиэмэтэ киириэҕэ

Быйыл сэтинньи 1 күнүттэн Арассыыйаҕа медицинскэй үлэһиттэргэ хамнас төлөбүрүн саҥа систиэмэтин пилотнай бырайыага киириэҕэ. Ол туһунан уураахха премьер Михаил Мишустин  илии баттаабытын туһунан бырабыыталыстыба сайтыгар этиллэр.
«Бу медицинскэй үлэһиттэр – быраастар, орто уонна алын персонал хамнастарын тэҥнээн биэрэр уонна кадр боппуруоһун быһаарар», - диэн этиллэр иһитиннэриигэ.
Пилотнай бырайыак сэттэ региоҥҥа – Белгород, Курган, Омскай, Оренбургскай уонна Тамбовскай уобаластарга, Севастопольга уонна Саха сиригэр киириэҕэ.  
Иһитиннэриигэ этиллэринэн, регионнар балыыһалара уонна поликлиникалара үлэһиттэр хамнастарын кээмэйин бэйэлэрэ быһаараллар.  Стимулирующай төлөбүрдэргэ биир кэлим ирдэбил суох.

«Ол түмүгэр медицинскэй тэрилтэ көрүҥүттэн биир хайысхалаах уонна квалификациялаах үлэһиттэр хамнастара атын-атын. Пилотнай бырайыак ити кыһалҕаны быһаарар сыаллаах», – диэн иһитиннэриигэ быһаараллар.
Эксперимент кэмигэр медиктэр акылааттара саҥа быраабыланан ааҕыллыаҕа – үлэ уустугуттан көрөн уонна регион экономическай сайдыытын коэффициенын учуоттаан. 
«Региональнай коэффициент уонна хамнас ааҕыытын ньыматын үлэҕэ уонна доруобуйа харыстабылыгар министиэристибэлэр этиилэринэн быраабыыталыстыба олохтуоҕа. Эмиэ  ити икки министиэристибэ компенсациялыыр уонна стимуляциялыыр төлөбүрдэр кээмэйдэрин, усулуобуйаларын биир кэлим испииһэктэрин оҥорон быраабыыталыстыбаҕа киллэриэхтэрэ», - диэн этиллэр иһитиннэриигэ.
Медицинскэй үлэһиттэр хамнастара пилотнай бырайыак кэмигэр билигин ылалларыттан намтыа суохтаах диэн тоһоҕолоон этиллэр. Бырайыак 2022 сыл кулун тутар ыйыгар диэри салҕаныаҕа. Доруобуйа харыстабылын эйгэтин үлэһиттэрин хамнастарыгар саҥа сыһыан РФ президенэ Владимир Путин сорудаҕынан оҥоһулунна.