Саха сирин фермердэрэ биисинэстэрин сайыннарыыга гыраан ылыахтара

РФ бэрэсидьиэнэ Владимир Путин көҕүлээбит Дьоҕус уонна орто биисинэһи өйүүр национальнай бырайыак чэрчитинэн, тыа сиригэр саҥа үлэлээн эрэр 38 фермер биисинэстэрин сайыннарыыга гыраан ылыахтара. Ол туһунан регионнааҕы тыа хаһаайыстыбатын Министиэристибэтин пресс-сулууспата иһитиннэрдэ. 
Ити фермердэр бары «Агростартап-2021» күрэх кыайыылаахтара. Күрэххэ кыттар докумуоннар презентациялара онлайн уонна офлайн көрүҥүнэн ыытыллыбыт. 
Кыайыылаахтар ортолоругар Нерюнгри оройуонун Иенгра сэлиэнньэтиттэн Трофим Сокольников баар. Кини куонкуруска сир аһын хомуйан оҥорон таһаарар биисинэс-былааны көмүскээбит. Итини таһынан бырайыак быһыытынан саҥа үлэ миэстэлэрэ тахсаллара күүтүллэр. 
«Трофим Сокольников гыраан харчытын сугуну, отону, морошканы хомуйан оҥорон таһаарар тэрили уонна сир аһын харайар дьиэни тутарга, өрөмүөннүүргэ туттар былааннаах», — диэн этиллэр иһитиннэриигэ.
Итини сэргэ атыыга-эргиэҥҥэ туттуллар тыа хаһаайыстыбатын атыылаһар соруктааҕа этилиннэ.