Саха сирин эдэр предпринимателлэрэ СММ баһылыыллар

Аан дойду барыта интэриниэккэ олорор. Аһыыр аспыт, таҥнар таҥаспыт, бэл диэтэр, эмп-томп, олох-дьаһах тутула барыта – маркетинг. Аныгы үйэҕэ дьон өҥөнү, табаары куйаар ситимин нөҥүө оҥорор буолла.

Урбаанньыттар атыыларын эмиэ интэриниэт нөҥүө батараллар. СММ- исписэлиистэр этэллэринэн, «бизнес социальнай ситимнэргэ суох буоллаҕына, эһиги бизнескит барыһа суох». Билигин социальнай ситимнэр ханнык баҕарар бизнес сорҕото буоллулар. Имидж эрэ буолбакка, ити ырыынак, ону кытта атыылаһааччыны кытта  коммуникация.

Александр Евсеев уонна Анисья Алексеева – «ELEVEN MEDIA CO» СММ-агентствоны төрүттээн ситиһиилээхтик үлэлии олороллор.

— Дорооболоруҥ! Агентствоҕыт туһунан кэпсии түһүҥ эрэ.

— “ELEVEN MEDIA CO” – бу социальнай ситим маркетинговай агенствота. Биһиги СММ-нан дьарыктанабыт, дизайны уонна фирменнэй истиили оҥорорго көмөлөһөбүт, таргет-рекламаны ыытабыт уонна урбаанньыттары үөрэтэбит. Ол эбэтэр кинилэр өҥөлөрө атыыга хамаҕатык барарыгар кыһаллан үлэлиибит. Дьон хараҕынан таптыыр, ол инниттэн сэргэх, дьон хараҕар хатанар контены оҥоробут.

— Кистэл буолбатах, эдэр дьон бизнескэ бараллара элбээтэ, манна эһиги туох санаалааххыт?

— Үп- харчы тутулуга суох буолуутун көрдөөн, бэйэлэрин идеяларын олоххо киллэрэр сыалтан, наймыламмыт үлэттэн босхолонор туһуттан, ону тэҥэ көҥүллүк сылдьыахтарын, олоруохтарын баҕараллар.

— Эһиги социальнай медиа-бөлөх эйгэтин тоҕо таллыгыт, чахчы инникилээх дуо?

— СММ – бу мэлдьи сайдар уонна билигин Дьокуускай ырыынагар ирдэниллэр маркетинг өйө суох хайысхата. Биһиги бу эйгэҕэ саҥаны айааччылар буолуохпутун баҕарабыт.

—  Эһиги тэрилтэҕит үлэтигэр  саамай сүрүнэ  тугуй?

— Эдэр уонна креативнай хамаанда буолабыт. Бренд тула бэйэбит санаабытын сатаан этэбит. Ону таһынан дизайн, хаартыска, видео да өттүнэн таһымнаахпыт. Атын агентстволартан уратыбыт диэн сайыннарыыга ылбыт бырайыакпытын тиһэҕэр тиийэ тиэрдэбит.

— Агенство тэринэргитигэр туох ыарахаттары көрүстүгүт?

— Биһиги эдэр тэрилтэ буолабыт.  Күн бүгүнүгэр диэри үлэ бырассыастарын олохтоон олоробут, ол эрээри улахан ыарахаттары көрүстүбүт дии санаабаппыт. Арай тустаах исписэлиистэр тиийбэттэрин бэлиэтиэххэ сөп.

— Салгыы ханнык хайысханан сайдар былааннааххыт?

— СММ эйгэтэ түргэнник сайдар, онон биһиги инникибитин тымтыктанар, туох буоларын эрдэттэн сатаан сэрэйэр кыахпыт суох, ол эрээри агентствобыт сайдарыгар былааммыт элбэх.