Саха сирин бастыҥ педиатра Дьокуускайга үлэлиир

Киин куорат 3 №-дээх балыыһатын бырааһа Чэмэлиинэ Сокорутова “Бастыҥ оҕо бырааһа” өрөспүүбүлүкэтээҕи куонкуруска “Бастыҥ учаастактааҕы педиатр” номинацияҕа кыайыылаах аатын ылла. Бу туһунан кини үлэлиир кэлэктиибэ киэн тутта кэпсээтэ.

Чэмэлиинэ Петровна  3 №-дээх балыыһаҕа 2010 сыллаахтан үлэлиир. “Кинини эппиэтинэстээх, идэтин баһылаабыт специалист быһыытынан сыаналыыбыт. Биһиэхэ, кырачааннарга уонна төрөппүттэргэ истиҥ сыһыанын бэлиэтиибит”, – дииллэр кэллиэгэлэрэ. Эдэр быраас балыыһа уопсастыбаннай олоҕор олус көхтөөх диэн бэлиэтээтилэр.

“Чэмэлиинэ Петровнаҕа былырыын “СӨ доруобуйатын харыстабылын туйгуна” үрдүк аат иҥэриллибитэ. Бу саҥа ылбыт үрдүк наҕараадата кини идэтигэр бэриниилээҕин өссө төгүл бигэргэттэ”, – диэн Дьокуускай куорат 3  №-дээх балыыһатын пресс-сулууспата иһитиннэрэр.